MANILA — Nilagdaan ni Pangulong Ferdinand Marcos Jr. bilang batas ang mga panukalang batas na lilikha ng College of Medicine sa piling state universities sa bansa.

Kabilang dito ang College of Medicine sa Benguet State University sa La Trinidad, Benguet (RA 11970); Southern Luzon State University sa Lucban, Quezon (RA 11971); University of Eastern Philippines sa Catarman, Northern Samar (RA 11972); Visayas State University sa Baybay, Leyte (RA 11974).

Sa ilalim ng mga bagong batas, ang mga ito ay maaari na ngayong mag-alok ng Doctor of Medicine Program, kabilang ang isang Integrated Liberal Arts and Medicine Program upang bumuo ng isang pangkat ng mga propesyonal na manggagamot at tutulong na palakasin ang sistema ng pangangalagang pangkalusugan ng bansa.

Nilagdaan din ng Pangulo ang RA 11973, na nagtatag ng Bicol University-College of Veterinary Medicine sa Ligao City, Albay upang makabuo ng isang pangkat ng mga propesyonal na doktor ng beterinaryo na sanay sa pag-iwas, pagsusuri, paggamot, at pagkontrol sa mga sakit ng hayop, kabilang ang mga terrestrial at aquatic na hayop.

Sa ilalim naman ng RA 11968, ipinagkaloob ni Marcos ang conversion ng San Isidro Satellite campus ng Leyte Normal University (LNU) sa isang regular na campus, na tatawaging “LNU-San Isidro Campus.”

Pinirmahan din niya ang RA 11969, na ginawang regular na campus ang Bataan Peninsula State University (BPSU)-Bagac Extension Campus sa Bagac, Bataan na tatawaging “BPSU-Bagac Campus.”

Nilagdaan ang mga bagong batas noong Disyembre 20, na magkakabisa 15 araw matapos itong mailathala sa Official Gazette, o sa isang pahayagan ng pangkalahatang sirkulasyon.