MANILA — Nakapagtala ang bansa ng 1,891 mga bagong kaso ng COVID-19 nitong nakalipas na Enero 16 hanggang 22.
Batay sa National COVID-19 case bulletin ng DOH, mayroon na lamang average na 270 kaso na naitala kada araw sa nakalipas na linggo. Mas mababa ito ng 35% kumpara sa mga kasong naitala mula Enero 9 hanggang Enero 15, 2023.
Apat na kaso ang nadagdag sa ‘severe at critical’ na kundisyon, habang naitala sa 104 ang bagong nadagdag sa mga nasawi kung saan 7 lamang dito ang nangyari mula Enero 9 hanggang Enero 22.
Sa healthcare utilization, nasa kabuuang 432 pasyente ang nasa ‘severe at critical’ na kundisyon. Naitala sa 3,509 ang nakaratay sa non-ICU beds at 370 indibidwal naman ang nasa ICU beds.
Umabot na sa 94.52% ng ‘target population’ ang ‘fully-vaccinated’ na katumbas ng 73,820,001 bakunado. Ito ay nang madagdagan ng 16,170 ang nabakunahan nitong nakalipas na linggo.
Nasa 21,293,632 naman ang nakapagpaturok ng unang booster shot makaraang madagdagan ng 51,925 nitong nakaraang linggo.