MANILA – Ang bagyong Paeng (internasyonal na pangalan: Nalgae) ay inaasahang lalabas ng Philippine Area of Responsibility (PAR) mamayang hapon o gabi habang ang Tropical Depression Queenie ay pumasok sa PAR alas-5 ng umaga nitong Lunes, Oktubre 31, ipinahayag ng Philippine Atmospheric Geophysical and Astronomical Services Administration (PAGASA).
Sa pinakahuling bulletin nito, sinabi ng PAGASA na si Paeng ay kumikilos patungo sa hilagang-kanlurang hangganan ng PAR. Huling namataan si Paeng sa layong 320 kilometers (km) West Northwest ng Iba, Zambales o 340 km West ng Dagupan City, Pangasinan. Taglay ni Paeng ang maximum sustained winds na 85 kilometers per hour (kph) malapit sa gitna na may pagbugsong aabot sa 105 kph at kumikilos pakanluran hilagang-kanluran sa bilis na 10 kph.
Nakataas pa rin ang Tropical Cyclone Wind Signal No. 1 sa mga sumusunod na lugar sa Luzon: Ilocos Norte, Ilocos Sur, La Union, Pangasinan, Apayao, Kalinga, Abra, Mountain Province, Ifugao, Benguet, Nueva Vizcaya, ang kanlurang bahagi ng Cagayan ( Santa Praxedes, Claveria, Sanchez-Mira, Pamplona, Abulug, Ballesteros, Allacapan, Lasam, Santo Niño, Piat, Tuao, Rizal), ang kanlurang bahagi ng Isabela (Cordon, City of Santiago, San Mateo, Ramon, Alicia, San Isidro , Quezon, Mallig, Roxas, San Manuel, Aurora, Cabatuan), ang hilagang-kanlurang bahagi ng Quirino (Cabarroguis, Diffun, Saguday), ang hilaga, kanluran, at timog na bahagi ng Nueva Ecija (Cuyapo, Lungsod ng Gapan, Talavera, San Leonardo , Santo Domingo, Rizal, San Isidro, Zaragoza, Llanera, Guimba, Aliaga, Science City of Muñoz, General Mamerto Natividad, Cabanatuan City, Carranglan, Quezon, San Antonio, San Jose City, Santa Rosa, Lupao, Nampicuan, Talugtug, Peñaranda , Jaen, Licab, Cabiao, Pantabangan), Pampanga, Bataan, Tarlac, Zambales, at ang kanlurang bahagi ng Bulacan (Hagonoy, Paombong, City of Malolos, Guiguinto, Calumpit, Pulilan, Plaridel, Baliuag, Bustos, San Miguel, San Ildefonso, San Rafael).
“Re-intensification into a severe tropical storm category remains likely within 12 to 24 hours. However, a weakening trend is expected by late Wednesday or on Thursday,” ayon sa state weather bureau.
Sinabi ng PAGASA na nananatiling posible ang katamtaman hanggang sa malakas na pag-ulan sa Batanes, Zambales, Bataan, Occidental Mindoro, at Palawan kabilang ang Calamian at Cuyo Islands. Mahina hanggang sa katamtaman na kung minsan ay posible pa rin ang malakas na pag-ulan sa Ilocos Region, Cordillera Administrative Region, Metro Manila, CALABARZON, Western Visayas, Babuyan Islands, nalalabing bahagi ng Central Luzon at MIMAROPA.
Sa ilalim ng impluwensya ng pag-alon ng Northeast Monsoon at Paeng, nananatiling may bisa ang marine gale warning sa karamihan ng mga seaboard ng Luzon.
