MANILA – Iniharap ni Pangulong Ferdinand “Bongbong” Marcos Jr. sa World Bank Group ang mga prayoridad ng kanyang administrasyon na naglalayong magdala ng pag-unlad sa Pilipinas, inihayag ng Malacañang nitong Biyernes.
Ito, matapos ibahagi ni Marcos sa kanyang opisyal na Facebook page na nakipagpulong siya sa mga nangungunang executive ng World Bank sa New York City noong Huwebes.
“The World Bank has stood with the Philippines in the most challenging times, bringing resources, linkages, and partnerships to bear on the country’s social, economic, and environmental initiatives since 1945,” wika ni Marcos.
“We are incredibly grateful and proud to continue partnering with the World Bank to improve the lives of Filipinos,” dagdag niya.
Sinabi ni Press Secretary Trixie Cruz-Angeles, sa isang press statement, na nakipagpulong si Marcos kay Manuela Ferro, Regional Vice President ng World Bank for East Asia and the Pacific, at Erivaldo Gomes, World Bank Executive Director for the Philippines.
“They discussed how to align the work of the Bank with the President’s priorities such as agriculture, clean energy, education and post Covid economic recovery,” isinaad ni Cruz-Angeles.
Tinalakay din ni Marcos at ng mga opisyal ng World Bank ang kahalagahan ng pananaliksik at pag-unlad, gayundin ang pagsisikap ng gobyerno ng Pilipinas na magtatag ng sariling virology institute ng bansa, ani Cruz-Angeles.
Sinabi ni Marcos, aniya, na maraming Pilipinong eksperto ang kailangan pang sumailalim sa karagdagang pagsasanay.
“They exchanged views on the state of Philippine agriculture and the areas that need to be addressed. The President also noted the needs and requirements of MSMEs (micro, small and medium enterprises) in order to continue to become viable and competitive,” wika niya.
Sinabi ni Cruz-Angeles na si Marcos at ang mga executive ng World Bank ay nakipag-ugnayan din sa financial inclusion at ang target na gawing digitalize ang humigit-kumulang 50 porsiyento ng mga personal na transaksyon sa 2023.
Naroon din sina Philippine Ambassador to the US Jose Manuel Romualdez, Finance Secretary Benjamin Diokno, Bangko Sentral ng Pilipinas Governor Felipe Medalla, Trade Secretary Alfredo Pascual, Socioeconomic Planning Secretary Arsenio Balisacan, at House Speaker Martin Romualdez sa pagpupulong ni Marcos sa mga matataas na opisyal ng World Bank.
Ang World Bank Group ay isa sa pinakamalaking mapagkukunan ng pagpopondo at kaalaman sa mundo para sa mga umuunlad na bansa.
Ang limang institusyon nito ay nagbabahagi ng pangako sa pagbabawas ng kahirapan, pagpapataas ng pinagsasaluhang kasaganaan, at pagtataguyod ng napapanatiling pag-unlad.
Ang pakikipagtulungan nito sa Pilipinas mula noong 1945 ay nagpakilos ng pagpopondo, pandaigdigang kaalaman, at pakikipagtulungan sa mga stakeholder upang suportahan ang mga gawain nito sa pagpapagaan ng kahirapan, pagpapahusay ng imprastraktura, at pagpapabuti ng kalusugan, nutrisyon at edukasyon.
Sa paglipas ng mga taon, ang World Bank Group ay aktibong tumutulong sa pagsulong ng pribadong sektor sa paglago sa sektor ng agrikultura, gayundin sa pagpapalawak ng pakikipag-ugnayan sa civil society, at pagtataguyod ng kapayapaan at kaunlaran sa Mindanao.
