MANILA – Nagpaplano ang Department of Education (DepEd) na bawasan ang workload ng mga guro sa pamamagitan ng pagtanggal ng mga administratibong gawain sa kanilang posisyon at pagbibigay sa kanila ng work-balancing tool na magagamit nila.

Ayon kay DepEd Spokesperson Michael Poa, layunin ng tool na ito na masuri ang kahusayan ng oras ng trabaho ng mga guro.

Sinabi ni Poa na determinado ang DepEd na kumuha hindi lamang ng mas maraming guro kundi maging ng mga non-teaching personnel para tulungan sila, sa pamamagitan ng pagsasama ng alokasyon ng badyet para sa pagkuha ng 10,000 guro sa 2023.

“‘Yun po ‘yung nakasaad sa work balancing tool na ila-launch natin once approved and completed. Para po makita natin ano ‘yung teaching time lang talaga, ano ‘yung admin tasks lang talaga, at ‘yung admin tasks ay gusto na nating ipasa sa non-teaching personnel or ma-reduce kung kaya namang ma-reduce,” aniya.

Sinabi ni Poa na target nilang ilunsad ang tool ngayong school year, bilang bahagi ng kanilang “agresibo” na hakbang upang bawasan ang workload ng mga guro.

“Within the year malalabas po natin ‘yan kasi nga po ito’y isang magandang tool para ma-identify muna natin kung ano ‘yung ginagawa ng mga teachers natin sa field or on the ground,” dagdag niya.

Bukod sa target na paglulunsad, sinabi ni Poa, ang DepEd central office ay magpapatupad din ng pagbabawas ng mga espesyal na takdang-aralin sa mga kaganapan, na nangangailangan ng partisipasyon ng mga guro, gayundin ang mga municipal o provincial na kaganapan na pinasimulan ng mga local government units.

“Na-ta-task ‘yung mga teachers natin na sumali sa activities na ito. Hindi na po natin gagawin, babawasan na po natin hanggat makakaya para po the teachers will have more time in the classrooms than outside activities,” wika niya.

Paggamit ng face mask

Bilang pagsasaalang-alang sa Executive Order (EO) 3, na ginagawang boluntaryo ang paggamit ng mga face mask sa mga open space, sinabi ni Poa na hindi pa sila nakikipag-ugnayan sa Department of Health (DOH) upang matiyak ang pag-iwas sa anumang pagtaas ng mga kaso ng coronavirus disease 2019 (Covid-19) sa mga paaralan.

“Our learners usually spend their time inside the classrooms, so it’s still mandatory. However, in the latest developments brought about by EO 3, we will coordinate with the DOH. We will consult the DOH because there are times our learners are in open spaces,” wika niya.

Sinabi ni Poa na ang resulta ng kanilang konsultasyon ay isasama sa kanilang mga alituntunin, na aniya ay ilalabas “sa lalong madaling panahon.”

“What we want to prevent is a major surge that would fully exhaust our critical care system in the Philippines. So again, we are still enforcing the health standards in our schools,” dagdag niya.

Bukod dito, ibe-verify at pagsasama-samahin din ng DepEd ang mga datos mula sa mga regional offices para makapagbigay ng aktwal na pagsubaybay sa Covid-19 infection sa mga mag-aaral sa buong bansa, aniya.