MANILA – Inihayag ng Malacañang nitong Miyerkules na ang Pilipinas ay “seryoso” na isinasaalang-alang ang mga panukala upang paluwagin ang mandatory face mask policy ng bansa kasunod ng mga datos na nagpapahiwatig na ang paggawa nito ay magpapalakas ng turismo.
Sa isang press briefing sa Singapore, sinabi ni Press Secretary Trixie Cruz-Angeles na kailangang maabot ng mga Department of Health (DOH) at Tourism (DOT) ang isang kompromiso sa pagluluwag sa mask requirement.
Sa pagbanggit sa datos mula sa DOT, sinabi ni Cruz-Angeles na ang ilang bahagi ng mundo na pinaluwag ang kanilang mga alituntunin sa face mask ay nakitaan ng malaking pagtaas ng pagdayo ng mga turista.
“Nagprisinta ang DOT na in certain states na nagluwag na tungkol sa face mask, tumataas ang tourism nila,” aniya.
“Gawa nga ng front and center ang ating turismo sa pagbangon ng ekonomiya, this matter is being taken seriously,” dagdag niya.
Bago ang pandemya, ang kontribusyon ng turismo sa 2019 gross domestic product (GDP) ay PHP2.48 trilyon, o hindi bababa sa 12.8 porsyento ng kabuuang ekonomiya.
Bumaba ang bahagi ng turismo sa GDP sa 5.2 porsyento noong 2021 kasunod ng pansamantalang paghinto sa mga flight at aktibidad sa turismo noong 2020.
Gayunpaman, sinabi ni Cruz-Angeles na magkakaroon pa rin ng “major say” ang DOH sa magiging kapalaran ng mandatory face mask policy.
“Kailangan magkatugma ‘yung ating DOH at ang ating DOT and other agencies bago tayo mag-revise ng ating mask policy,” dagdag niya.
Noong nakaraang linggo, naglabas ang Cebu City ng executive order (EO) na hindi obligado ang paggamit ng face mask sa mga open space at karamihan sa mga lugar.
Iginiit ni DOH officer-in-charge Maria Rosario Vergeire ang pagsusuot ng face mask dahil siyentipikong nagbibigay ito ng 70 hanggang 80 porsiyentong proteksyon laban sa Covid-19 at iba pang nakakahawang sakit.
Si Dr. Rontgene Solante, isang dalubhasa sa nakakahawang sakit, ay tinanggihan din ang pagtanggal ng mga face mask dahil sa pagkakaroon ng napaka-nakahahawa na variant ng Omicron.
