MANILA – Nakipagpulong noong Huwebes si Pangulong Ferdinand “Bongbong” Marcos Jr. sa Private Sector Advisory Council (PSAC) upang tuklasin ang posibleng pakikipagtulungan para sa pagpapaunlad ng mga sektor ng imprastraktura, tubig, at enerhiya.
Ang Office of the President (OP), sa opisyal nitong Facebook page, ay nagbahagi ng ilang larawang kuha sa pakikipagpulong ni Marcos sa PSAC sa Palasyo ng Malacañang sa Maynila.
“President Ferdinand Romualdez Marcos Jr. meets with members of the Private Sector Advisory Council (PSAC) to discuss how Public-Private Partnerships (PPP) can help the Philippines improve its infrastructure, water, and energy services,” ayon sa OP.
Wala pang karagdagang detalye ang Malacañang tungkol sa pagpupulong.
Nangako si Marcos, sa kanyang unang State of the Nation Address, na maglalagay ng premium sa iba’t ibang larangan, kabilang ang imprastraktura, kalusugan at enerhiya.
Nagdaos si Marcos ng serye ng mga pagpupulong sa PSAC mula nang maupo siya sa pagkapangulo noong Hunyo 30.
Ang PSAC, sa pakikipagpulong nito kay Marcos noong Agosto, ay humingi ng pagpapalawak ng micro, small, and medium enterprises (MSMEs) sa bansa upang lumikha ng mas maraming oportunidad sa trabaho para sa mga Pilipino.
Kasunod ng kanyang pakikipagpulong sa pribadong sektor, tiniyak ni Marcos na isa sa mga prayoridad ng administrasyon ang muling pagbabalik ng MSMEs.
Binubuo ng MSMEs ang 99.51 porsiyento ng mga establisimiyento ng negosyo sa Pilipinas at gumagamit ng humigit-kumulang 63 porsiyento ng mga manggagawa sa bansa.
Noong Agosto din, nakipagpulong si Marcos sa PSAC upang ipahayag ang kanyang suporta sa planong mag-alok ng “ladderized” na programa para sa mga nars upang palakasin ang sektor ng kalusugan at tugunan ang sinasabing “brain drain,” o ang pag-alis ng mga propesyonal sa bansa para sa mas malaking suweldo o kalagayan ng pamumuhay.
Ang panukalang ladderized program na pagtibayin ng pambansang pamahalaan ay ipinatupad na ng University of the Philippines (UP)-Manila at mga piling local government units (LGUs).
Sa ilalim ng programa, nag-aalok ang UP Manila ng dalawang taong iskolarship para sa mga midwife na babalik sa komunidad upang maglingkod pagkatapos ng kurso. Kapag nagkaroon sila ng karanasan, babalik sila sa UP Manila para mag-aral ng nursing sa loob ng dalawang taon.
Noong Hulyo, si Marcos, na kasabay na nagsisilbing pinuno ngDepartment of Agriculture, ay nagpahayag din ng pananabik sa posibleng pakikipagtulungan sa pribadong sektor upang mapabuti ang sektor ng agrikultura.
Ang PSAC ay naglalayon na regular na mag-ulat sa Pangulo upang magbigay ng puna sa kung ano ang nangyayari at gumawa ng mga rekomendasyon sa modern policy development.
