MANILA — Ipinahayag ng Department of Foreign Affairs na wala itong natatanggap na ulat na napinsalang Pilipino sa mga sagupaan sa pagitan ng mga tagasuporta ng mga kalabang gobyerno ng Libya. 

Isinaad ni Amb. Ma. Teresita Daza, tagapagsalita ng DFA, na binabantayan ng Philippine Embassy sa Tripoli ang sitwasyon.

“The DFA strongly urges our kababayans to take shelter at home or in other safe places while the fighting is ongoing and to contact our Embassy through its hotline numbers for immediate assistance,” wika ni Daza sa media Linggo ng gabi.

Ang mga sagupaan sa Tripoli ay nagpatuloy sa magdamag at hanggang sa Linggo, oras ng Pilipinas, na nag-iwan ng 23 katao ang namatay at 140 ang nasugatan. Anim na ospital din ang tinamaan ng bakbakan at hindi naabot ng mga ambulansya ang mga apektadong lugar.

Ang dalawang magkaribal na administrasyong naglalayong kontrolin ang bansa sa Hilagang Aprika at ang malawak na oil resources nito ay nagtuturo sa isa’t isa para sa pinsalang iniwan ng mga sagupaan.

Ang Embahada ng Pilipinas sa Tripoli ay naglabas ng mga payo na nagsasabi sa mga Pilipino sa Tripoli at mga kalapit na distrito na iwasan ang mga lugar kung saan nagpapatuloy ang mga sagupaan.

Mayroong 2,164 Pilipino na nakabase sa Libya, ayon sa DFA. Karamihan sa kanila ay mga nurse at iba pang healthcare worker, habang mayroon ding mga Filipino university instructor at professional na nagtatrabaho sa oil and gas industry.