MANILA – Itinalaga ni Pangulong Ferdinand “Bongbong” Marcos Jr. ang negosyanteng si Alejandro “Al” Tengco bilang chairperson at chief executive officer (CEO) ng Philippine Amusement and Gaming Corporation (Pagcor).

Ang appointment ni Tengco ay kinumpirma ng Pagcor sa isang press release.

Siya ang hahalili kay Andrea Domingo na itinalaga ni dating Pangulong Rodrigo Duterte noong 2016.

Si Tengco ay nagmamay-ari ng Nationstar Development Corp. at dating bise alkalde ng Malolos, Bulacan.

Ang kanyang appointment ay dumating sa loob ng isang buwan matapos tanggihan ng Malacañang ang mga tsismis na ang abogadong si George Erwin Garcia ay tinapik ni Marcos para pamunuan ang state-run gaming firm.

Samantala, pinangalanan din ni Marcos ang abogadong si Juanito L. Sañosa, Jr. bilang presidente at chief operating officer ng Pagcor.

Pinili rin niya si dating Cavite Rep. Gilbert Remulla, engineer Francis Democrito Concordia, at Jose Maria Ortega bilang mga miyembro ng board of directors ng Pagcor.

Ibinahagi ni Remulla ang larawan ng kanyang sarili na nakasuot ng barong sa kanyang opisyal na Twitter account matapos umanong manumpa sa Palasyo ng Malacañan.

“And so the new chapter begins,” aniya sa kanyang tweet.

Si Remulla ay kapatid ni Justice Secretary Crispin “Boying” Remulla at Cavite Governor Jonvic Remulla.