MANILA – Pinag-aaralan ni Pangulong Ferdinand “Bongbong” Marcos Jr. ang panukalang magpatibay ng Integrated Water Resources Management (IWRM) program para sa bansa.
“This program is an approach to promote the coordinated development and management of water, land, and related resources to maximize economic and social welfare without compromising our ecosystem,” sinabi ng Office of the President sa opisyal nitong Facebook page.
Kasabay na nagsisilbi si Marcos bilang Kalihim ng Department of Agriculture.
Sa kanyang unang State of the Nation Address noong Hulyo 25, hinimok ng Pangulo ang Kongreso na magpasa ng panukalang lumikha ng isang Department of Water Resources.
Sinabi niya na ang iminungkahing IWRM ay gagamitin bilang estratehikong balangkas para sa pambansang pamamahala ng tubig, paggawa ng patakaran, at pagpaplano sa sandaling malikha ang departamento.
Sinabi rin ni Marcos na nais niyang tingnan ng gobyerno ang sitwasyon ng fresh water supply sa bansa, lalo na sa mga urban area.
Binanggit niya na marami sa mga water supply system sa bansa ay nagsimula noong 1950s at dapat na ngayong i-rehabilitate at pagbutihin.
Inatasan ng Pangulo ang Department of Environment and Natural Resources at ang Department of Public Works and Highways na galugarin ang posibleng pakikipagtulungan sa pribadong sektor upang matugunan ang napakahalagang sitwasyong ito.
