MANILA – Iminungkahi rin ng Department of Transportation (DOTr) sa ilalim ng nakaraang administrasyon ang panukala ni Senator Robinhood Padilla na gumamit ng aerial cable cars bilang solusyon sa problema sa trapiko sa Metro Manila.
Noong 2018, sinabi ng DOTr na sinisiyasat nito ang posibilidad na makakuha ng technical assistance o pondo mula sa French government para sa feasibility study sa mga cable car para makapagbigay ng alternatibong paraan ng pampublikong transportasyon.
Ang panukala para sa cable car system mula sa Santolan Station ng Light Rail Transit-2 sa Marikina City hanggang Barangay Rosario sa Pasig City ay inendorso sa National Economic and Development Authority.
“The cable car project will ease the traffic in the eastern side of Metro Manila as per studies of the DOTr,” ayon sa pahayag na inilabas ng opisina ni Padilla noong Linggo.
Nauna nang sinabi ni Padilla na nakita niya sa kanyang paglalakbay sa ibang bansa kung paano nakakatulong ang mga cable car sa paglipat ng mga tao.
Muli rin niyang iginiit na hindi siya naghain ng panukalang batas tungkol sa paglikha ng cable car system ngunit nagpahayag lamang ng “spontaneous at impromptu manifestation” na dulot ng kanyang kaalaman at karanasan bilang dayuhang manlalakbay at bilang suporta sa mga panawagan na mapabuti ang sistema ng riles ng bansa.
