MANILA – Pinangalanan ni Pangulong Ferdinand “Bongbong” Marcos Jr. si Health Undersecretary Maria Rosario Vergeire bilang officer-in-charge (OIC) ng Department of Health (DOH) at hinirang si dating Light Rail Transit Authority administrator Mel Robles bilang general manager ng Philippine Charity Sweepstakes Office (PCSO).

Ginawa ni Press Secretary Trixie Cruz-Angeles ang anunsyo sa isang press briefing na ginanap noong Huwebes.

“Ngayong araw po ay itinilaga po si Dr. Rosario Vergeire bilang OIC ng Department of Health,” wika ni Cruz-Angeles.

Bago ang kanyang bagong appointment, nagsilbi si Vergeire bilang DOH Undersecretary for Public Health Services Team.

Noong Hunyo, itinalaga si Vergeire na pamunuan ang National Vaccination Operations Center (NVOC), ang katawan na inatasan upang tiyakin ang wastong pag-iimbak, imbentaryo at paghahatid ng mga bakuna sa coronavirus disease 2019 (Covid-19) at bumuo ng naaangkop na mga alituntunin para sa pambansang programa ng pagbabakuna laban sa coronavirus.

Inihayag ni Cruz-Angeles, sa parehong briefing, ang nominasyon ni Robles bilang PCSO general manager.

“Sa Philippine Charity Sweepstakes Office naman, nominado si Mr. Mel Robles, dating Light Rail Transit Authority administrator, bilang general manager,” wika niya.

Si Robles, ani Cruz-Angeles, ay kinilala sa kanyang pangunahing tungkulin sa paggawa ng LRTA na kumikita sa ilalim ng kanyang pamumuno.

Si Robles ay dating board member din ng Intercontinental Broadcasting Corporation.

Hindi pa naglalabas ang Malacanang ng kopya ng appointment papers nina Vergeire at Robles.