MANILA – Pinangunahan ng Presidential Security Group (PSG) nitong Lunes ang inter-agency meeting para talakayin ang paghahanda sa kaligtasan at seguridad para sa unang State of the Nation Address (SONA) ni Pangulong Ferdinand “Bongbong” Marcos Jr. ngayong Hulyo 25.

“This is in line with the guidance of PSG Group Commander, Colonel Ramon Zagala, PA to ensure the safety and security of the President, to include all the attendees and the whole event itself,” ayon sa PSG post.

Pinangunahan ni PSG Task Force SONA 2022 Commander Col. Nelson Aluad ang pagpupulong kasama ang core group.

Dinaluhan ito ng mga augmentation mula sa iba’t ibang ahensya at yunit ng seguridad ng gobyerno sa ilalim ng Armed Forces of the Philippines, Philippine National Police, Bureau of Fire Protection, Philippine Coast Guard, Manila International Airport Authority, at Civil Aviation Authority of the Philippines, Department of Health at National Intelligence Coordinating Agency.

Ang serye ng mga ocular, walk-through, at inter-agency coordination ay gaganapin din hanggang sa mismong araw ng SONA, ayon sa PSG.

Ang SONA ay isang obligasyon sa konstitusyon at taunang tradisyon kung saan ang Pangulo ay nag-uulat sa katayuan ng bansa at naglalahad ng agenda ng gobyerno para sa darating na taon at nagmumungkahi sa Kongreso ng ilang mga panukalang batas.

Itinatakda ng 1987 Philippine Constitution ang petsa ng SONA kada taon sa ikaapat na Lunes ng Hulyo.

Ang SONA ay nagmamarka ng pagsisimula ng isang bagong regular na sesyon ng Kongreso.

Sa huling dalawang SONA ni dating Pangulong Rodrigo Duerte, kinailangang ipakita ng mga bisita ang kanilang patunay ng pagbabakuna at mga negatibong resulta ng pagsusuri sa Covid-19 sa pamamagitan ng reverse transcription-polymerase chain reaction dalawang araw bago ang kaganapan.

Kailangan ding sumailalim sa rapid antigen test ang mga bisita sa Batasang Pambansa sa araw ng SONA.