MANILA — Ang bagong minimum wage rates sa National Capital Region (NCR) at Western Visayas (Region 6) ay magkakabisa sa unang bahagi ng susunod na buwan, inihayag ni Labor Secretary Silvestre Bello III.

Sa isang pahayag, sinabi ni Bello na pinagtibay ng National Wages and Productivity Commission (NWPC) ang pagtaas ng suweldo na iniutos ng Regional Tripartite Wages and Productivity Boards (RTWPBs) para sa NCR o Metro Manila at Western Visayas.

Para sa Metro Manila, magkakabisa ang bagong minimum wage sa Hunyo 4; habang para sa Western Visayas, magsisimula ito sa Hunyo 5, ayon sa Department of Labor and Employment (DOLE).

Sa ilalim ng Wage Order No. NCR-23 na may petsang Mayo 13, 2022, ang daily minimum wage sa NCR ay tataas ng P33, na magdadala sa bagong basic pay rate sa P570 para sa mga non-agriculture sector worker at P533 para sa mga agriculture worker.

Ipinahayag ni Bello, na namumuno sa NWPC, na kinatigan din ng komisyon noong Biyernes ang wage order ng RTWPBs sa Cagayan Valley (Region 2), MIMAROPA (Mindoro provinces, Marinduque, Romblon at Palawan o Region 4B), at SOCCSKSARGEN (Region 12).

Aniya, ang wage order ay nagbibigay ng mas mataas na sahod para sa mga domestic worker sa Cagayan Valley; minimum wage earners at domestic worker sa MIMAROPA at minimum wage earners sa SOCCSKSARGEN.

Batay sa Wage Order No. 02-DW-04 ng RTWPB sa Cagayan Valley noong Mayo 18, nagbigay ng P1,000 buwanang dagdag sahod para sa mga domestic worker sa rehiyon. Dinadala nito ang kanilang buwanang minimum na suweldo mula P4,000 hanggang P5,000.

Ang Wage Order No. RB-MIMAROPA-10 ay nagbibigay ng dagdag na P35 para sa mga manggagawa sa Rehiyon 4B. Ibig sabihin, P329 na ang minimum daily pay sa mga establisyimento na wala pang 10 manggagawa at P355 sa mga establisyimento na may 10 o higit pang manggagawa.

Sa kabilang banda, ang Wage Order No. RB-MIMAROPA-DW-03 ay nagbibigay ng pagtaas ng P1,000 sa buwanang sahod ng mga domestic worker, na tinataas ang kanilang pangunahing suweldo sa P4,500 bawat buwan.

Panghuli, ang Wage Order No. RBXII-22 ng RTWPB XII ay nagtataas ng arawang sahod ng P32 sa SOCCSKSARGEN. Ngunit ito ay ibibigay sa mga tranche ng P16 sa bisa ng Wage Order at P16 sa Setyembre 1, 2022.

Ang bagong minimum wage rate sa rehiyon ay magiging P368 para sa non-agriculture sector at P347 para sa agriculture/service/retail establishments.

Ang mga wage order ay magkakabisa 15 araw pagkatapos na mailathala ang mga ito sa isang panrehiyong pahayagan.