MANILA – Sinabi ng isang pari na nakabase sa Pangasinan noong Huwebes na sinusuportahan ng Simbahang Katoliko ang tandem nina Vice President Leni Robredo at Senador Kiko Pangilinan dahil bahagi ito ng moral na obligasyon nito na gabayan ang mga tao sa pagpili ng kanilang mga pinuno.

Ilang pari at madre ng Katoliko ang nagbahay-bahay sa Lingayen noong Miyerkules para samahan si Aika Robredo na nangampanya para sa kanyang ina.

“Kailangan naming lumabas, kailangan naming tumayo para sa kanila. Bakit? Hindi dahil sa taong iyon bagkus iyon ang mandato namin sa Diyos,” wika ni Fr. Jake Rubillos sa isang pahayag. 

Aniya, ang paninindigan ng simbahang Katoliko ay hindi para kay Robredo, kundi para sa katotohanan, at tamang pamamahala, lalo na sa mga mahihirap.

Nauna rito, humigit-kumulang 1,400 Katolikong obispo, pari, at diakono, na kabilang sa grupong “Clergy for the Moral Choice” ang nag-endorso sa Leni-Kiko tandem sa isang simbahan ng parokya sa Tondo.

Humigit-kumulang 200 miyembro ng mga klero, relihiyoso, at mga konsagradong tao mula sa Archdiocese of Cebu ang nagpahayag din ng kanilang suporta sa tandem nang bumisita ang anak ni Robredo na si Tricia noong Huwebes.