MANILA – Ipinahayag ni Pangulong Rodrigo R. Duterte noong Linggo na ang informal settlement ay patuloy na isang “napakaseryosong” problema sa Pilipinas.

“Nobody but nobody can solve it except the Filipino and ‘yung workers sa government nakatutok talaga,” sinabi ni Duterte sa groundbreaking ceremony ng Pampanga Provincial Hospital-Clark sa San Fernando City, Pampanga.

Muli niyang iginiit ang kanyang panawagan sa Department of Agrarian Reform (DAR) na tiyaking maipapamahagi sa mga nangangailangan ang lahat ng mga idle government-owned land bago siya bumaba sa puwesto ngayong Hunyo.

“My orders to the Department of Agrarian Reform, basta lahat ng lupa ng sa gobyerno ‘pag may squatters na, ibigay mo na,” wika niya. 

Sinabi ni Duterte na ayaw niyang makarinig ng mga dahilan tungkol sa tinatawag na mga planong gamitin ang lupa sa hinaharap.

“Do not give me about – that a certain land or lot will be utilized by this department, blah, blah, blah. At magdaan na lang ang mga ilang administrasyon hindi naman ninyo nagamit, eh ibigay mo na sa tao,” iginiit niya. 

Ang gobyerno, aniya, ay may sapat na pera para makabili ng mga bagong lupain sakaling kailanganin ang mga ito sa hinaharap.

“Do not hang on to a property that’s idle or talagang hindi talaga magamit. Kung magamit man, it could be about two administrations from now. So pagka ganoon sabi ko ibigay mo na at magbili ang gobyerno ng ano bagong lupa tutal hindi naman nawawalaan ng pera ang gobyerno sa totoo lang,” wika niya. 

Sa ngayon, ang mga lupaing pag-aari ng gobyerno ay ipinamahagi sa mga kwalipikadong benepisyaryo sa buong bansa, partikular sa heograpikal at liblib na mga lugar na pinapasok ng New People’s Army.

Noong Pebrero 15, 2019, nilagdaan ni Duterte ang Executive Order No. 75 na nag-uutos sa lahat ng ahensya na tukuyin ang mga lupaing pag-aari ng gobyerno na maaaring ipamahagi sa mga benepisyaryo.

Sa ilalim ng EO, inatasan ang DAR na kunin ang lahat ng mga lupaing pag-aari ng gobyerno na nakalaan o angkop para sa agrikultura ngunit hindi na aktwal, direkta, at eksklusibong ginagamit para sa layunin kung saan sila ay nakalaan upang maipamahagi ang mga ito sa mga kwalipikadong benepisyaryo.

Noong nakaraang buwan, nagpahayag ng pag-asa si Duterte na ipagpapatuloy ng kanyang kahalili ang programa sa reporma sa lupa ng kanyang administrasyon.