MANILA – Pinaalalahanan ni Pangulong Rodrigo R. Duterte noong Huwebes ang mga kandidato sa pulitika na gawin ang kanilang bahagi sa pagtiyak ng isang “malinis at tapat” na halalan sa Mayo 9, na binanggit na ang pagkabigong gawin ito ay isang “insulto” sa mamamayang Pilipino.

“Kaya ang sinabi ko sa lahat ng politiko, give us a clean and honest elections…Insulto sa atin ‘yan, sa inyo,” aniya sa talumpati sa 43rd Commencement Exercises ng Philippine National Police Academy (PNPA) “Alab-Kalis” Class of 2022 sa Silang, Cavite.

Nauna nang sinabi ni Duterte na magiging “highest honor” niya na i-turn over sa kanyang kahalili ang kanyang posisyon dahil alam niyang ginawa niya ang kanyang makakaya para pagsilbihan ang bansang Pilipino.

Idaraos ng Pilipinas ang national at lokal na halalan nito sa Mayo 9 — ang unang pambansang halalan sa bansa sa panahon ng pandemya ng Covid-19.

Muling sinabi ni Duterte na gagamitin niya ang “doktrina ng Alunan”, na naglilimita sa bilang ng mga armadong guwardiya ng mga pulitiko sa bansa na dinaranas ng karahasan sa pulitika.

Ang doktrina ng Alunan ay ipinakilala noon ni Interior Secretary Rafael Alunan III, na nagsilbi noon sa pamumuno ni Fidel Ramos mula 1992 hanggang 1998.

“Yung mga politiko, ang dapat lang sa kanila according to the Alunan doctrine na more than two armed is already a private army,” dagdag niya.

Pinayuhan din niya ang mga kadete ng PNPA na maaaring italaga bilang bodyguard ng mga kandidato na tiyaking mahigpit na sinusunod ang doktrina ng Alunan.

“If you happen to be assigned as a security, sabihin mo lang doon sa amo mo, ‘Sir, ito ang limitasyon…I cannot be a part of the politics here and I am only duty-bound what is the mandate of the law’,” aniya.

Nauna nang nagbabala si Duterte na ang mga kandidatong mayroong higit sa dalawang bodyguard ay huhulihin at kakasuhan ng gobyerno.

Ayon kay Interior Secretary Eduardo Año, nakatala ang Department of the Interior and Local Government ng kabuuang 2,536 na paglabag sa gun ban mula Enero 9 hanggang Abril 18 na nagresulta sa pagkakaaresto ng 2,653 katao.

Aniya, nasamsam ng mga awtoridad ang 974 na nakamamatay na armas, 2,013 na baril, at mahigit 10,000 mga bala.

Idinagdag niya na noong Abril 18, hindi bababa sa 5,809 na armas ang naisuko.

Nagkabisa ang nationwide gun ban noong Enero 9 at magtatapos sa Hunyo 8.