MANILA – Ang Pfizer, Moderna, Sinovac, AstraZeneca, Sputnik Light at Janssen Covid-19 vaccine ay inaprubahan bilang pangalawang booster shot ng Food and Drug Administration (FDA), ipinahayag ng isang opisyal ng kalusugan noong Martes.
Sa isang pampublikong briefing sa telebisyon, sinabi ni National Vaccination Operations Center chair Myrna Cabotaje na ang FDA ay naglabas ng emergency use authorization para sa anim na tatak.
Naghihintay pa rin ang center para sa pagsusuri at mga huling rekomendasyon ng Health and Technology Assessment Council (HTAC).
“Ready na ang guidelines, idadagdag lang natin ‘yung provisions ng FDA EUA saka final recommendations ng HTAC,” wika ni Cabotaje.
Ang pangangasiwa ng pangalawang booster shot na orihinal na nakatakda noong Abril 20 ay inaasahang magsisimula sa susunod na linggo.
Ang mga healthcare worker, senior citizen, at immunocompromised ay uunahin.
Ang pangalawang booster shot ay maaaring ibigay apat na buwan pagkatapos ng unang booster dose, sabi ni Cabotaje.
“Gagawin natin sa NCR [National Capital Region] muna, although nagre-request ang Region 3 and Region 4A na isama na sila and then expand natin pagkatapos,” dagdag niya.
Noong Abril 19, sinabi ng NVOC na may kabuuang 66,979,873 ang ganap na nabakunahan habang 12,687,684 ang nakatanggap ng kanilang booster dose.
