MANILA – Iminungkahi ng Department of Education (DepEd) noong Martes na simulan ang school year 2022-2023 sa Agosto 22.

Sa isang virtual press briefing, inihayag ni Undersecretary Diosdado San Antonio na plano nilang sakupin ang 215 araw ng mga klase para sa susunod na taon ng pasukan, simula Agosto 22 hanggang Hulyo 7, 2023, at ang school calendar kasama ang 11 linggo bawat quarter.

“Sa darating po na pasukan, blended na po tayo, mas marami rin ‘yung face-to-face, pero hindi tayo papayag na may mga disruptions sa classes in the form of mga activities during the 10 weeks that the quarter is on, lahat po ay turo nang turo, at matututo nang matututo ang mga bata,” wika niya.

Samantala, ang remedial at advanced summer classes ay target din na isagawa mula Hulyo 17 hanggang Agosto 26, 2023.

“Ang proposal po namin dahil kailangan ngang mag-double time, kailangang magkaroon ng additional period para po sa ating intervention activities at remedial,” aniya.

Samantala, ang mga iminungkahing school break ay kinabibilangan ng Christmas at New Year’s break mula Disyembre 19 hanggang Enero 1, 2023, at mid-year break mula Pebrero 6 hanggang 10, 2023.

Ang mga end-of-the-year rites ay mainam na nakaiskedyul mula Hulyo 10 hanggang 14, sa susunod na taon.