MANILA – Nagpahayag ang Malacañang noong Sabado ng pag-asa na ang paghahatid ng mas maraming bakuna sa coronavirus disease 2019 (Covid-19) sa bansa ay magpapabilis sa pagbabakuna ng mga menor de edad. 

Sa isang Facebook post, malugod na tinanggap ni Presidential Spokesperson Harry Roque ang pagdating ng humigit-kumulang 1,014,390 dosis ng nakuhang Pfizer vaccine sa bansa. 

Sinabi ni Roque na ang pagkuha ng karagdagang mga bakuna ay makatutulong sa pagpapaigting ng kampanya ng gobyerno sa pagbabakuna. 

“Ito ay para mas mapabilis ang pagbabakuna sa ating mga kabataan,” aniya. 

Sa 1,014,390 Pfizer vaccine dosis na nakuha ng gobyerno, inaasahan ng Maynila na makakatanggap ng humigit-kumulang 813,150 dosis. 

Samantala, makakatanggap ang Cebu at Davao ng 100,620 Pfizer dosis bawat isa.

Hinimok ni Roque ang publiko na magpabakuna upang maprotektahan ang kanilang sarili laban sa Covid-19.

“Halina’t magpabakuna,” aniya, habang tinitingnan niya bilang “magandang balita” ang pagdating ng mas maraming bakuna laban sa Covid-19 sa bansa. 

Noong Oktubre 15, may kabuuang 1,153 katao na wala pang 18 taong gulang ang nabakunahan bilang bahagi ng pilot pediatric vaccination program na ginanap sa walong ospital sa buong Metro Manila. 

Sinimulan ng gobyerno ang pagbabakuna sa mga menor de edad gamit ang Pfizer, na isa sa dalawang bakunang pinahintulutan ng Food and Drug Administration para sa mga batang may edad na 12 hanggang 17. 

Ang ikalawang yugto ng pagbabakuna sa mga batang may comorbidities na may edad 12 hanggang 17 ay nagsimula noong Biyernes sa mahigit 20 ospital at inoculation sites sa Metro Manila.