MANILA – Inanunsyo ng Malacañang nitong Biyernes na pinalawig ng Pilipinas ang travel ban sa mga manlalakbay mula sa India at sa siyam pang mga bansa hanggang Agosto 15 upang mapigilan ang pagkalat ng mas nakahahawang Delta variant ng coronavirus disease 2019 (Covid-19).

Ayon kay Presidential Spokesperson Harry Roque, nagpasya si Pangulong Rodrigo Duterte na panatilihin ang pagbabawal sa mga manlalakbay mula sa India, Pakistan, Nepal, Sri Lanka, Bangladesh, Oman, United Arab Emirates, Indonesia, Malaysia, at Thailand, batay sa rekomendasyon ng Inter-Agency Task Force for the Management of Emerging Infectious Diseases (IATF-EID).

“President Rodrigo Roa Duterte approved the recommendation of the Inter-Agency Task Force to extend the travel restrictions currently imposed (on) 10 countries starting August 1 until August 15, 2021,” sinabi ni Roque sa isang pahayag.

Ang desisyon ay ginawa bilang tugon sa pagtaas ng mga kaso ng Delta variant sa buong bansa.

May karagdagang 97 kaso ng Delta variant ang naiulat sa Pilipinas noong Hulyo 29, na nagdala sa kabuuang bilang ng mga kaso ng mas nakahahawang coronavirus sa bansa sa 216.

Halos 88 sa 97 bagong kaso ng Delta variant ay mga lokal na kaso, anim ang nagbabalik na mga Pilipino sa ibang bansa, at tatlo pa ay vini-verify.

Sa 97 na mga bagong kaso, 94 ang gumaling na at tatlo ang nasawi.

Ang Delta variant, na natuklasan sa India, ay nagdudulot ng mga bagong outbreak sa buong rehiyon ng Asya-Pasipiko, kabilang ang Timog-silangang Asya.

Natukoy na ito ay 60 porsyento na higit na nakahahawa kaysa sa Alpha variant.

Ayon sa mga eksperto sa kalusugan, ang isang taong nahawahan ng Delta variant ay maaaring makahawa sa lima hanggang walong katao.

Binigyang diin ni Duterte ang pangangailangan sa pag “double-time” sa pagbabakuna ng mas maraming mga Pilipino sa gitna ng paglitaw ng Delta variant, na sinabi niyang “nagdudulot ng napakaraming nakakatakot na kwento” dahil “mas agresibo” ito kaysa sa orihinal na variant.