Matapos ang kanyang mungkahi na i-regulate ang paggamit ng social media alinsunod sa pagsasabatas ng Anti-Terrorism Law, nilinaw ni Armed Forces of the Philippines (AFP) Chief-of-Staff Lt. Gen. Gilbert Gapay na nais niyang bigyan ng regulasyon ang mga bagay na ipinopost sa social media at hindi ang mga users mismo.
Aniya, “What I meant by that is to regulate and put order on the social media platforms, not the users per se (Ang ibig kong sabihin ay bigyan ng kaayusan ang social media platforms at hindi i-regulate ang users mismo)”.
Dagdag pa niya, “We are not here to curtail the freedom of expression of the users (Hindi tayo narito para supilin ang kalayaang magpahayag ng users) […] But what I’m saying is to regulate the platforms on the contents they allow to be uploaded (Ang sinasabi ko ay i-regulate ang plataporma hinggil sa content na maaaring i-upload)”.
Umani ng kritisismo ang bagong AFP chief matapos ang kanyang mungkahi sa implementing rules and regulations (IRR) ng nabanggit na batas, kung saan may balak umanong subaybayan ang aktibidad ng mga sinususpetsahang terorista online.
Ayon kay Gapay, ibig lamang niyang ipunto na ginagamit ang social media bilang instrumento ng mga terorista upang maisakatuparan ang kanilang mga masasamang plano.
“The web is very open and na-capitalize ito ng various terrorist groups, not just local groups, but also global terrorist cells (Bukas ang web at ginagamit ito ng iba’t-ibang teroristang grupo, hindi lamang lokal kundi pati global),” ani Gapay.
Dagdag pa niya, “Hindi na minsan nache-check [yung mga contents], you will see violent, indecent materials uploaded (makakita ka ng mga mararahas at hindi disenteng posts).”
Binanggit din niyang ilang mga bansa ang nakikipag-ugnayan sa social networking sites na Facebook, Twitter, at YouTube para siyasatin ang mga contents na inu-upload sa mga platapormang ito. Nais ni Gapay na gawin din ito sa ating bansa.
“We are proposing the idea through DICT (Department of Information and Communications Technology), if we could coordinate with these social media platforms to somehow regulate (Iminumungkahi namin ang ideya sa DICT, kung puwede tayong makipagkoordinasyon sa mga social media platforms para i-regulate) yung mga ina-upload nila sa kanilang platforms. Like violent materials, like terrorist groups beheading their captives and even bomb-making, it’s all in the Internet (lahat ng ito ay nasa internet)”.
