MANILA – Hindi na papayagan ang mga e-bikes, e-trike at tricycle sa mga national road sa Metro Manila simula Abril 15, paalala ng Metropolitan Manila Development Authority (MMDA) sa publiko.

“Yes, we will implement [the ban] by April 15. We were able to talk to stakeholders, and they agreed,” sinabi ni MMDA Acting Chairman Romando Artes.

Saklaw ng pagbabawal ang Roxas Boulevard, Taft Avenue, South Luzon Expressway, Shaw Boulevard, Ortigas Avenue, Magsaysay Boulevard/Aurora Boulevard, Quezon Avenue/Commonwealth Avenue, A. Bonifacio Avenue, Rizal Avenue, Del Pan/Marcos Highway/McArthur Highway, Recto Avenue , President Quirino Avenue, Araneta Avenue, EDSA, Katipunan/C.P. Garcia Avenue, Southeast Metro Manila Expressway, Elliptical Road, Mindanao Avenue, at Marcos Highway.

Kabilang sa mga ipinagbabawal na sasakyan ay e-bikes, e-trikes, tricycle, pedicabs, pushcarts at kuliglig.

Sinabi ni Artes na ang mga lalabag ay pagmumultahin ng P2,500.

Dapat may driver’s license ang mga tricycle driver, kung hindi, ma-i-impound ang kanilang sasakyan kapag nahuli.

Ang data mula sa MMDA ay nagpakita na ang mga de-kuryenteng sasakyan ay sangkot sa 554 na aksidente sa kalsada noong 2023.