MANILA – Halos 5,000 transport sector workers na apektado ng Public Utility Vehicle Modernization Program ang nakatanggap ng tulong mula sa gobyerno, ayon sa Department of Labor and Employment (DOLE).
Sinabi nito sa isang ulat na noong Enero 2024, ibinigay na ng DOLE at ng Department of Transportation ang P134.94 milyong halaga ng mga proyektong pangkabuhayan sa kabuuang 4,498 transport workers.
Sinabi ni Labor Secretary Bienvenido Laguesma na patuloy na tinutulungan ng DOLE ang mga displaced jeepney drivers at operators sa pamamagitan ng “enTSUPERneur” livelihood program nito, na binabanggit na ang bawat apektadong transport worker ay binibigyan ng minimum na P30,000 halaga ng in-kind livelihood assistance sa ilalim ng nationwide alternative livelihood program.
Idinagdag niya na ang DOLE ay nag-aalok ng mga proyektong pangkabuhayan na kinabibilangan ng rice retailing, variety store at food stall establishment, animal raising, agricultural input provision at tailoring.
Sinabi ni Laguesma na ang lahat ng kinauukulang ahensya ng gobyerno ay nagsanib-puwersa para tulungan ang tinatayang 30,000 displaced jeepney drivers at operators na nabigong mag-consolidate para sa modernization program.
Binigyan din aniya ng Technical Education and Skills Development Authority ang mga jeepney workers ng skills development training sa pamamagitan ng “Tsuper Iskolar” Program nito mula noong 2019.
