MANILA — Magsasagawa muli ng re-supply mission ang Armed Forces of the Philippines (AFP) para sa mga tropang Filipino na nakatalaga sa BRP Sierra Madre (LST-57) na permanenteng naka-angkla sa Ayungin Shoal ng West Philippine Sea.
Ayon kay AFP spokesperson Col. Medel Aguilar, kalahati lang ang na-unload na supply at kulang para sa mga sundalo na tumatao sa BRP Sierra Madre.
Hindi na baba ang mga kailangan ng mga kapwa sundalo dahil sa pangha-harass ng Chinese Coast Guard at militia vessels noong Sabado, Agosto 4.
Nabatid na isa lamang sa dalawang barko na may dala ng mga suplay ang nakapunta sa BRP Sierra Madre.
Ani Aguilar, hindi niya alam kung hanggang kailan magtatagal ang suplay kung kaya’t kailangan na mag-suplay ulit para sa mga sundalo sa susunod na dalawang linggo.
“I’m not sure but we need to resupply them within the next two weeks but we will see how we are going to do it dahil sa nangyayari ngayon sa West Philippine Sea,” ani Aguilar.
Idinagdag din niya na ito ang layunin ng AFP, ang siguruhing may sapat na pagkain, tubig at kagamitan ang kanilang mga tropa upang maisagawa ang tungkulin nila sa lugar.
Nitong Lunes, mariing kinondena ng National Task Force for the West Philippine Sea (NTF-WPS) ang pagtatangka ng China na pigilan ang pagsusuplay ng Philippine Coast Guard sa mga tropang naka-istasyon sa Ayungin Shoal.
Opisyal nang ipinatawag ng Department of Foreign Affairs nitong Lunes si Chinese Ambassador to Manila Huang Xilian at kinalampag na tigilan na ang mga illegal na aktibidad sa WPS. (philstar)
