MANILA — Pasado na sa ikatlo at huling pagbasa ng Kamara ang 31 sa 42 panukala na prayoridad na maisabatas ng administrasyon ni Pangulong Ferdinand R. Marcos Jr. at Legislative-Executive Development Advisory Council (LEDAC).
Ang pinakahuling naipasa ng Kamara ay ang 30-year National Infrastructure Program Bill at ang panukalang National Land Use Act.
“We are proud of our collective accomplishment – 31 out of 42 and counting. As of today, we have achieved a significant part of our goal in less than a year of session,” sabi ni Speaker Ferdinand Martin G. Romualdez.
“I thank our colleagues for their hard work, as well as the various political parties in the House which have committed to support the passage of priority measures determined by the President and the LEDAC and the House itself,” dagdag pa nito.
Ayon kay Speaker Romualdez, sumusuporta ang mga panukala sa pagnanais ni Pangulong Marcos na maipatuloy ang paglago ng ekonomiya, maparami ang mapapasukang trabaho at mabigyan ng oportunidad na kumita ang mga Pilipino.
Sa ilalim ng 2023-2052 National Infrastructure Program (House Bill 8078) ilalatag ang mga infrastructure projects na kailangan ng bansa upang magtuluy-tuloy ang paggawa sa mga ito.
“It will be an all-encompassing program covering not only public works like roads, bridges and expressways, which we commonly refer to as infrastructure, but also energy, water resources, information and technology, agri-fisheries, food logistics, and socially-oriented structures such as school buildings and other educational facilities,” sabi ni Speaker Romualdez.
Layunin naman ng National Land Use Act (HB 8162) na makapaglatag ng polisiya kaugnay ng paggamit ng lupa.
Sa 42 priority bills, tatlo ang napirmahan na ng Pangulo at naging batas. Ito ang SIM (subscriber identify module) Registration Act, pagpapaliban ng October 2022 Barangay and Sangguniang Kabataan elections at ang pagbabago sa fixed term ng mga piling opisyal ng Armed Forces of the Philippines.
Ang panukala naman na nagbubura sa utang ng mga agrarian reform beneficiary ay napadala na sa Malacañang.
Naipadala na rin ng Kamara sa Senado ang Maharlika Investment o Sovereign Fund bill, na akda ni Speaker Romualdez at sinertipikahan na prayoridad ng Pangulo.
