MANILA – Ipinahayag ni Vice President Sara Duterte noong Huwebes na target ng Department of Education (DepEd) na magpatupad ng mandatory toothbrush drills para sa school year 2024-2025.

Sa isang panayam sa telebisyon, binigyang-diin ni Duterte, na siya ring kasabay na kalihim ng Edukasyon, ang kahalagahan ng kalusugan ng ngipin at pagpapalaganap ng kamalayan sa mga mag-aaral.

“We target to roll it out sa field, 2024 or 2025, pero hinahabol namin ‘yung school year 2024-2025 na masali ‘yan, parang mandatory toothbrush drill instead of mandatory officers’ Reserved Officers Training [Corps] (ROTC), dito kasi kami sa basic education,” wika niya.

Sinabi ni Duterte na ang panukalang ito ay bahagi ng holistic program, na naglalayong hubugin ang pagkatao at kapakanan ng mga bata.

“Isa ‘yan sa gusto naming i-implement, mayroon kaming kini-create na program ngayon na we intend to run corollary doon sa pagpapatakbo ng ROTC sa higher education. Sinasabi namin sa kanila, ituturo namin dito life skills, service, values, dito sa basic education, kasama ‘yung good hygiene, kasama ‘yung toothbrush drills,” wika niya.

Sinabi ni Duterte na mahalaga ang kalusugan ng ngipin, isinasaalang-alang ang mga panganib na maaaring idulot nito sa mga bata at matatanda kapag napabayaan.

Aniya, ang dental protection ay isang personal na adbokasiya, binanggit ang kanyang natutunan sa kanyang ama na si dating Pangulong Rodrigo Duterte.

“The one person that is very particular to teeth is, I don’t know if the world knows this, is President Duterte. Kaya siguro subconsciously, nakuha ko rin ‘yun kay PRD [President Rodrigo Duterte], plus ‘yung exposure ko sa trabaho ko as mayor, na nakakausap ko ‘yung mga dentista, and they always advocate na preventable naman ‘yan,” dagdag niya.

Partikular na tinutukoy ni Duterte ang mga preventable dental issue tulad ng pagkabulok ng ngipin, impeksyon, at iba pang kahihinatnan na dulot ng kawalan ng kamalayan sa wastong paglilinis.

“If we just guide our young ones, because they are very malleable… Kasi para lahat ng bata, maganda ang smile,” wika niya.

Bahagi ng iminungkahing programa ng mga dental drill ay ang pamamahagi ng mga dental kit na may mga kagamitang panturo para sa wastong paglilinis ng ngipin, na sinamahan ng mga kampanyang pang-impormasyon tungkol sa usapin.

Sa kasalukuyan, kasama sa kampanya ng pagbaBAGo ni VP Sara ang pamamahagi ng mga toothbrush na may toothbrush guides, na isa sa kanyang mga classic na programa sa panahon ng kanyang pamumuno sa Davao City bilang alkalde.