MANILA – Ang Medium Term Fiscal Framework (MTFF) ng administrasyong Marcos ay magsisilbing roadmap para sa kaunlaran ng bansa, inihayag ng Department of Budget and Management (DBM) nitong Martes.
Ito, habang pinuri ni Budget Secretary Amenah Pangandaman ang Senado at ang Kapulungan ng mga Kinatawan sa pagsuporta sa 2022-2028 MTFF ng administrasyon.
“The MTFF is the roadmap for our Agenda for Prosperity,” sinabi ni Pangandaman sa isang press statement, na binanggit na ito ang unang pagkakataon na ang isang Kongreso, sa pamamagitan ng isang resolusyon na ipinasa ng Kongreso, ay nagpatibay ng isang komprehensibong diskarte sa pananalapi para sa buong termino ng isang administrasyon.
Noong nakaraang linggo, pinagtibay ng Senado ang isang resolusyon na sumusuporta sa 2022-2028 MTFF ng administrasyong Marcos na naglalayong ihanay ang lahat ng economic recovery programs at legislative priorities.
Pinasalamatan ni Pangandaman ang mga mambabatas sa kanilang pangako sa pagtiyak na ang kanilang legislative agenda ay magabayan ng mga target na itinakda sa balangkas ng pananalapi.
“It is encouraging to see that Congress is united with the administration in our economic objectives for the nation. We commend Congress on the adoption by both the Senate and the House of Representatives of their respective resolutions backing the MTFF,” wika niya.
Sa ilalim ng balangkas, layunin ng pamahalaan na makamit ang 6.5 hanggang 7.5 porsiyentong paglago ng gross domestic product (GDP) sa 2022; 9 porsiyento o single-digit poverty rate sa 2028; 3 porsiyentong national government deficit sa GDP ratio sa 2028, at mas mababa sa 60 porsiyentong national government debt-to-GDP ratio sa 2025, isinaad ni Pangandaman.
“It is with these objectives in mind that we have designed our National Expenditure Program (NEP),” wika niya.
Pinasalamatan ni Pangandaman ang Kongreso sa pagkilala sa kahalagahan ng isang fiscal consolidation at resource mobilization plan, kabilang ang mga hakbang tulad ng rightsizing sa mga istruktura at tauhan ng gobyerno.
Ang MTFF ay magsisilbing blueprint ng bansa, partikular para sa fiscal deficit reduction, pagsulong ng fiscal sustainability, at pagpapagana ng matatag na paglago ng ekonomiya habang sinisimulan nito ang pagbangon mula sa Covid-19 pandemic.
Ang Senate Concurrent Resolution 3 na sumusuporta sa MTFF ay itinaguyod ni Finance Committee chairperson Sonny Angara, habang ang katulad na resolusyon na inihain sa Kamara ng mga Kinatawan ay itinaguyod ni Marikina Rep. Stella Luz Quimbo, vice chairperson ng House Appropriations Committee.
Sinusuportahan ng resolusyon ang near-term at medium-term socio-economic agenda na tumutugon sa mga isyu sa mga lugar ng seguridad sa pagkain, transportasyon at logistik, enerhiya, pamamahala sa pananalapi, kalusugan, edukasyon, proteksyong panlipunan, at kahusayan sa burukrasya.
Nanawagan din ito para sa pagrepaso at pag-update ng MTFF pagkatapos ng tatlong taon o sa 2025, bago ang ika-20 Kongreso, upang ipakita ang kasalukuyang kalagayan at pag-unlad ng ekonomiya.
