MANILA – Hindi na kailangan ang pagpapatupad ng lockdown upang maiwasan ang pagkalat ng monkeypox sa bansa, inihayag ng isang eksperto sa nakakahawang sakit noong Lunes.

Sa ipinalabas na Laging Handa public briefing, sinabi ni Dr. Rontgene Solante na ang monkeypox ay hindi kasing tindi ng Covid-19 at ang lockdown ay hindi ang angkop na solusyon para dito.

“That’s overacting in terms of lockdown as an option for monkeypox infection. Ang current cases natin are not yet enough to say na kailangan tayo mag-lockdown,” aniya.

Sa ngayon, nakapagtala ang bansa ng apat na kaso ng monkeypox.

Binigyang-diin ni Solante ang kamalayan tungkol sa sakit at ang mga sintomas nito ay pinakamahalaga lalo na sa mga rehiyon kung saan natukoy ang mga kaso.

Idinagdag niya na ang pagkakaroon ng kaalaman ay maaaring humantong sa mas madaling pagtuklas dahil ang mga tao ay hihingi ng tulong sa mga doktor kapag mayroon silang mga sintomas.

“At importante kung ma-diagnose sila, they will also be isolated to stop the human-to-human transmission,” wika nito.

Noong Biyernes, sinabi ni Department of Health officer-in-charge Maria Rosario Vergeire na hindi pa nila makumpirma nang may katiyakan kung mayroong local transmission ng monkeypox sa bansa.

Ito, matapos ang ikaapat na kaso – isang 25-taong-gulang na Pilipino – ay nagsiwalat ng walang dokumentadong kasaysayan ng paglalakbay sa mga bansang may kumpirmadong kaso ng monkeypox.

“The likelihood of local transmission could be there, but we will not panic. Mas lalo natin paigtingin ang mga protocols sa mga hospitals that are caring for these patients,” wika ni Solante.

Dapat din aniyang maitatag ang contact tracing para sa mabilis na pagtuklas ng mga posibleng kaso bago sila magkaroon ng sintomas dahil ang monkeypox virus ay may 21 araw na incubation period.