MANILA – Tiniyak ng Malacañang nitong Huwebes na ang mga utang ng bansa ay gagamitin sa mabuti, partikular na para pondohan ang bansa laban sa umiiral na coronavirus disease 2019 (Covid-19) pandemic.
Ipinahayag ito ni acting presidential spokesperson at Communications Secretary Martin Andanar matapos iulat ng Bureau of the Treasury (BTr) na umabot sa PHP12.68 trilyon ang state liabilities noong Marso, mas mataas ng 4.8 porsyento o PHP586.29 bilyon kumpara sa PHP12.09 trilyon na naitala sa katapusan ng Pebrero.
“We assure our people that the country’s borrowings, which put the county’s outstanding debt to more than PHP12-T, as end of March 2022, shall be put into good use and utilized effectively and efficiently,” wika ni Andanar.
Sinabi niya na ang mga paghiram ay kinakailangan upang himukin ang paglago ng ekonomiya at matiyak ang agarang pagpopondo para sa mga emerhensiya tulad ng pandemya ng Covid-19.
“Recent borrowings would be for our Covid-19 response and recovery and resiliency efforts. We need to sustain our country’s long-term socioeconomic growth and development,” dagdag niya.
Noong nakaraang buwan, binigyang-katwiran ni Duterte ang pagtaas ng utang sa bansa dahil napilitan ang gobyerno na humiram ng pera dahil sa kakulangan ng pagkukunan ng pondo.
Aniya, walang masama sa paghiram ng pera, basta walang iregularidad sa paggastos ng gobyerno.
Inatasan pa ni Duterte ang mga lokal na pamahalaan na manghiram ng pera ngunit pinaalalahanan sila na siguraduhing hindi ito gagamitin sa mga katiwalian.
Ayon kay Finance Secretary Carlos Dominguez III, ang paglobo ng utang nang dahil sa pandemya ay mauunawaan dahil sa pangangailangang palakasin ang financing sa gitna ng pagbaba ng kita dahil sa mga lockdown.
Ang susunod na administrasyon, aniya, ay kailangang gumawa ng mga patakaran at manatili sa napakahigpit na disiplina sa pananalapi upang makaahon sa utang.
Batay sa datos mula sa BTr, ang tumatakbong utang ng gobyerno ay 69.9 porsyento na galing sa lokal at 30.1 porsyento sa external na pinanggalingan.
Ang makabuluhang pagtaas sa kabuuang debt portfolio ay una nang hinimok ng mas mataas na mga pag-utang, sa pamamagitan ng pagbebenta ng mga government securities, sa parehong mga local at foreign creditor, sinabi ng BTr.
Umabot sa PHP8.87 trilyon ang utang sa loob ng bansa, mas mataas ng PHP455.45 bilyon o mas mataas ng 5.4 porsiyento kumpara noong Pebrero.
Samantala, ang external debt ay nasa PHP3.81 trilyon, mas mataas ng PHP130.84 bilyon o mas mataas ng 3.6 porsyento kumpara sa nakaraang buwan, sinabi ng BTr.
