MANILA – Ang nakatakdang pagpupulong sa pagitan nina Pangulong Rodrigo Duterte at Chinese President Xi Jinping sa Abril 8 ay gaganapin lamang nang virtual, inihayag ng Malacañang nitong Biyernes.

Ito, matapos ianunsyo ni Duterte noong Huwebes na nakatakda siyang magsagawa ng dialogue kay Xi sa susunod na linggo kaugnay ng posibleng spillover ng hidwaan sa pagitan ng Russia at Ukraine sa Asia, kasama ang Pilipinas at China.

“Kagabi po, si President Duterte mismo ang nag-announce na meron siyang meeting with China officials. At ang alam po natin ay online po ang meeting na ito sa darating po na April 8,” wika ni acting Deputy Presidential Spokesperson at Communications Undersecretary Michel Kristian Ablan sa isang virtual presser.

Ayon kay Ablan, si Xi ang nag-udyok sa nakatakdang pakikipag-usap kay Duterte.

Gayunpaman, hindi niya alam ang mga posibleng isyu na maaaring pag-usapan nina Duterte at Xi.

“Ang nag-initiate po nito ay ang gobyerno ng Tsina. Insofar as we’re concerned, this meeting is still in the preparatory state. Kung ano ang magiging issues at matters na idi-discuss ng world leaders na ito ay malalaman natin in the coming days,” wika ni Ablan.

Sa isang talumpati na binigkas sa Lapu-Lapu City noong Huwebes, sinabi ni Duterte na ang China ay “hindi magiging idle,” sakaling ang Russia ay magsagawa ng nuclear war sa gitna ng patuloy na tensyon nito sa Ukraine.

Sinabi ni Duterte na ang posibleng panghihimasok ng China ay lilikha ng isang “seryosong problema,” dahil maaaring magdulot ito ng gulo para sa Pilipinas.

Nauna nang sinabi ni Duterte na mananatiling neutral ang Pilipinas sa hidwaan ng Russia at Ukraine.

Gayunpaman, sinabi ng Malacañang na maaaring magsilbing tagapamayapa si Duterte sa pagitan ng Russia at Ukraine, sakaling humingi ng tulong ang mga world leader, kung isasaalang-alang ng Pilipinas ang “neutral na posisyon at ipinag-uutos ng konstitusyon na patakarang panlabas ng kapayapaan sa lahat ng mga bansa.”

Ang Pilipinas ay isa sa mga bansang bumoto para sa United Nations General Assembly (UNGA) Resolution sa laki ng humanitarian woes na dulot ng pagsalakay ng Russia sa Ukraine.

Ang resolusyon ng UNGA ay nananawagan sa lahat ng partido na magbigay ng ganap na proteksyon para sa mga sibilyan na tumatakas sa armadong labanan at karahasan at tiyakin ang ligtas na pag-access para sa humanitarian aid sa mga nasa Ukraine at mga kalapit na bansa.