MANILA – Muling iginiit ni Pangulong Rodrigo Roa Duterte noong Huwebes na mananatiling neutral ang Pilipinas sa nagpapatuloy na digmaan sa pagitan ng Russia at Ukraine.

Sa isang pahayag sa Palo, Leyte, tumanggi si Duterte na pumanig, at sinabing mas gugustuhin niyang huwag makialam sa pagsalakay ng Russia sa Ukraine.

“Itong neutrality na ‘to, we just maintain it,” wika ni Duterte sa inagurasyon ng bagong Leyte Provincial Capitol at ang turnover ng iba’t ibang proyekto ng gobyerno sa Eastern Visayas.

Inilabas ni Duterte ang pahayag, dahil idiniin niya na ang bansa ay hindi makikipaglabanan sa anumang mga bansa.

“Hindi natin away iyan, huwag tayong makialam,” aniya.

Siya, gayunpaman, ay nagtaas ng pag-aalala sa posibleng epekto ng hidwaan sa pagitan ng Russia at Ukraine sa buong mundo, kung sakaling ito ay lumala at umabot sa isang digmaang nukleyar.

“If it goes nuclear, that’s the end of the world. Tapos na talaga lahat,” wika ni Duterte.

Ang International Court of Justice (ICJ), ang pinakamataas na hukuman ng United Nations (UN) para sa mga hindi pagkakaunawaan sa pagitan ng mga estado, ay nag-utos sa Russia na agad na itigil ang mga aksyong militar sa Ukraine, na sinasabing ito ay “labis na nag-aalala” sa paggamit ng puwersa ng Moscow.

Nagsampa ng kaso ang Ukraine laban sa Russia sa harap ng ICJ noong Pebrero upang magsagawa ng mga paglilitis laban sa pagsalakay ng Moscow.

Inamin ni Duterte na ang kasalukuyang sitwasyon ni Russian President Vladimir Putin ay “nakakasakit” sa kanya dahil itinuring niya ito bilang kanyang “kaibigan”.

“Ako diyan sa Russia, nasasakitan ako. Kaibigan ko si Putin eh. He’s a personal friend,” aniya.

Sa inagurasyon ng Narvacan Farmers’ Market sa Ilocos Sur noong Marso 4, sinabi ni Duterte na kailangang manatiling neutral ang Pilipinas hanggang sa ang realidad ang magtulak sa bansa na “pumili sa kung aling panig tayo”.

Sinabi din ni Duterte na si Putin ay isa nang “suicidal” na lider.