MANILA – Iniulat ng Philippine National Police (PNP) nitong Biyernes na may kabuuang 973 na lumabag ang nahuli sa loob ng isang buwan mula nang magkabisa ang gun ban para sa halalan ngayong Mayo 9.

Sa pagbanggit sa pinakahuling datos nito, sinabi ng police force na ang nangungunang limang rehiyon sa bilang ng mga naarestong lumabag ay ang National Capital Region na may 290, na sinundan ng Calabarzon na may 91; Central Visayas na may 71, at Western Visayas na may 53.

Ang mga nahuli ay binubuo ng 945 sibilyan, 13 security guard, walong pulis, at pitong tauhan ng militar.

Mayroong 749 na baril, 4,708 piraso ng bala, at 336 na nakamamatay na armas ang nasamsam mula sa 855 na operasyon ng pulisya.

Ayon sa Commission on Elections (Comelec) Resolution No. 10728, ang pagdadala ng mga baril o nakamamatay na armas ay ipinagbabawal sa labas ng tirahan at sa lahat ng pampublikong lugar mula Enero 9 hanggang Hunyo 8.

Exempted sa pagbabawal ang mga alagad ng batas ngunit dapat silang magkaroon ng awtorisasyon mula sa Comelec at magsuot ng uniporme na inireseta ng ahensya habang nasa opisyal na tungkulin sa panahon ng halalan.

Ang mga lalabag ay maaaring makulong ng hindi bababa sa isang taon ngunit hindi hihigit sa anim na taon at hindi dapat sumailalim sa probasyon.

Nahaharap din sila sa diskwalipikasyon na humawak ng pampublikong katungkulan, pag-alis ng karapatan sa pagboto, at pagkansela o permanenteng diskwalipikasyon upang makakuha ng lisensya ng baril.