MANILA – Humigit-kumulang 75 porsiyento ng mga kaso ng coronavirus disease 2019 (Covid-19) na naitala ngayong buwan ay mild at moderate, sinabi ng isang opisyal ng kalusugan nitong Martes.

Sa isang online media forum, sinabi ni Health Undersecretary Maria Rosario Vergeire na 13 porsyento lamang ng mga kaso ang asymptomatic at 12 porsyento ang malala at kritikal.

“Amin pong pinapaalala na maaring manatili po muna sa bahay ang mga mild cases, malaking tulong po ang pag-home isolate or quarantine para mabawasan po ang load sa ating healthcare workers and even our facilities,” aniya.

Idinagdag niya na ang Department of Health (DOH) ay magbibigay ng Kalinga Kits sa mga indibidwal na sumasailalim sa home isolation o home quarantine.

Kabilang dito ang 10 piraso ng paracetamol, 10 piraso ng vitamin C, 10 piraso ng carbocisteine, 20 piraso ng facemask, dalawang bar ng sabon, isang alcogel, isang disinfectant spray, at isang tips sheet.

Ang asymptomatic o mga kaso na may mild hanggang moderate na mga sintomas ay maaari lamang sumailalim sa home isolation o home quarantine kung sila ay may hiwalay na silid mula sa iba pang miyembro ng pamilya, may hiwalay na banyo, at hindi nakatira kasama ang mga senior citizen, maliliit na bata, at mga indibidwal na may komorbididad.

Samantala, ang mga indibidwal na may malubhang sintomas ay hinihimok na pumunta sa ospital para sa agarang paggamot.

Ang mga sumusunod ay mga patnubay para sa paggamot sa mild o moderate na mga sintomas sa bahay.

“Bagamat po mas mild ang Omicron variant, kapag hindi po maayos ang pagpapagaling sa bahay, maaari po itong magdulot ng problema sa ating  mental health and physical health,” wika ni Vergeire.

Para matulungan ang mga indibidwal na nasa home quarantine o isolation na pamahalaan ang stress, inirerekomenda ni Vergeire ang paggamit ng Lusog-Isip mobile self-care app ng DOH na nagtatampok ng mga diskarte sa pagpapabuti ng kapakanan ng isang tao.