MANILA – May kabuuang 16 na lugar sa Metro Manila ang nasa ilalim ng granular lockdown dahil ang Alert Level 3 ay itinaas sa National Capital Region (NCR) mula Enero 3 hanggang 15, ipinahayag ng Philippine National Police (PNP) nitong Martes.
Lumabas sa datos ng PNP na 14 na lugar ang nasa ilalim ng hurisdiksiyon ng Northern Police District at tig-iisa para sa Manila Police District at Southern Police District.
Ang bilang ng mga lugar na nasa ilalim ng granular lockdown sa buong bansa ay tumaas mula walo hanggang 27, kabilang ang mga rehiyon ng NCR, Mimaropa, at Cordillera.
Inulit ni NCR Police Office (NCRPO) Chief, Maj. Gen. Vicente Danao Jr., ang kanyang panawagan para sa mas mahigpit na pagpapatupad ng guidelines at health protocols para mapigilan ang pagkalat ng coronavirus disease 2019 (Covid-19) sa mga komunidad, lalo na sa gitna ng tumataas na bilang ng mga kaso kabilang ang Omicron variant.
“We will be strict in the implementation of laws and ordinances to protect our citizens from this deadly virus,” sinabi ni Danao sa isang pahayag.
Sa NCRPO, 14 na aktibong kaso ang naitala noong Enero 2, matapos mag-ulat ng isang aktibong kaso lamang noong Disyembre 27 noong nakaraang taon.
Bukod sa NCR, isinailalim na rin sa Alert Level 3 ang mga lalawigan ng Rizal, Bulacan, at Cavite kasunod ng tumataas na bilang ng mga kaso ng Covid-19 sa mga lugar na ito.
Sa ilalim ng Alert Level 3, papayagan ang 30 porsiyentong indoor venue capacity at 50 porsiyentong outdoor venue capacity para sa ilang aktibidad, kung ang mga empleyado ay ganap na nabakunahan.
Gayunpaman, ang face-to-face o in-person classes para sa pangunahing edukasyon; contact sports, maliban sa mga isinasagawa sa ilalim ng bubble-type setup; mga funfairs/carnivals at kid amusement industries; mga lugar na may live voice o wind instrument performer at audience; casino, karera ng kabayo, sabong, at operasyon ng mga sabungan, lottery at pustahan, at iba pang mga gaming establishment; at ang mga pagtitipon sa mga tirahan na may mga indibidwal na hindi kabilang sa parehong sambahayan ay ipagbabawal.
