MANILA – Pinuri ni Senador Christopher “Bong” Go ang pag-apruba ni Pangulong Rodrigo Duterte para sa pagbibigay ng meals, accommodation, and transportation (MAT) benefits para sa mga kwalipikadong healthcare workers (HCWs) sa pamamagitan ng cash equivalents.

Noong Huwebes, Disyembre 2, sinabi ni Go na inaprubahan ng Pangulo ang pagpapalabas ng mga benepisyo sa anyo ng katumbas na salapi sa 423,314 HCWs sa buong bansa. Ang mga benepisyo ay maaari na ngayong i-release sa cash equivalents na humigit-kumulang PHP3,500 bawat buwan.

Bilang Senador at Tagapangulo ng Senate Committee on Health and Demography, nauna nang hinimok ni Go ang executive na magbigay ng agarang naaangkop na benepisyo sa mga health worker sa pinakakombenyente at mahusay na paraan na posible.

“Mahirap maging healthcare worker lalo na sa panahon ngayon. Hindi basta-basta ang trabaho nila kaya dapat natin ibigay ‘yung dapat ibigay na mga allowances na nararapat sa kanila bilang mga front-liners,” wika ni Go.

Kapansin-pansin, ang Department of Health ay naging instrumental sa paghiling sa Opisina ng Pangulo para sa monetization ng mga MAT benefits, na pinakinggan ang hiling ng mga healthcare workers.

Sinuportahan ito ni Go at itinulak ang panukala na sinasabing, “kung ano ang pinaka-makakatulong at maginhawa sa kanila, iyon ang ibigay natin.”

Upang matiyak na ang lahat ng HCW ay maayos na nabayaran, itinutulak ni Go ang agarang pagpasa ng Senate Bill No. 2421, na kanyang inakda, upang magbigay ng isang nakapirming monthly allowance para sa mga HCW sa panahon ng state of emergency dahil sa pandemya.

Isinasaalang-alang ng panukala ang isang naunang bill na inihain ni Go at nagbibigay ng Covid-19 Risk Allowance bilang kapalit ng special risk allowance (SRA) at iba pang pinansiyal na kabayaran na ipinagkaloob sa ilalim ng Bayanihan 2.

“Lahat naman ng healthcare workers na naka-duty ay maituturing na exposed sa banta ng Covid-19. Hindi nakikita ang kalaban na ito kung kaya’t mahirap paghiwalayin pa kung sino ang exposed at sino ang hindi,” wika ni Go.

Noong 2019, naging instrumental ang mambabatas sa pagsasabatas ng Republic Act No. 11466 o ang “Salary Standardization Law 5”. Ang panukala ay nagbibigay sa lahat ng mga sibilyang empleyado ng gobyerno, kabilang ang mga nars, na tumaas na suweldo na pinaghiwa-hiwalay sa mga tranche.

Sa parehong taon, tiniyak din niyang sapat na pondo ang inilaan para sa pagpapatupad ng desisyon ng Korte Suprema noong 2019 na nagpatibay sa Section 32 ng Philippine Nursing Act of 2002, na nagtatakda ng minimum salary grade ng Nurse 1 position sa SG-15.