MANILA – Inihayag ni Commission on Elections (Comelec) Commissioner Rowena Guanzon nitong Miyerkules na hindi inaprubahan ng poll body ang 126 na grupong naghahangad na magparehistro bilang party-list para sa 2022 national at local elections.
“126 applicants for Party List registration were denied by @Comelec,” wika ni Guanzon sa isang post ng kanyang Twitter account.
Gayunpaman, sinabi niya na “mahigit 100 ng mga tinanggihang party-list na aplikante ang naghain ng motion for reconsideration”.
Sinabi ni Guanzon na kailangang lutasin ng Comelec ang usapin sa unang bahagi ng susunod na buwan para sa pag-imprenta ng mga balota.
“@COMELEC must finish by December 6. Final date for ballot preparation is December 15,” aniya.
Sa panahon ng paghahain mula Oktubre 1 hanggang 8, may kabuuang 270 party-list groups ang naghain ng kanilang Certificates of Nomination and Acceptance para lumahok sa party-list system of representation.
Noong Oktubre 25, inilabas ng Comelec ang mga pangalan ng 53 bagong party-list groups na nabigyan ng rehistrasyon.
Ang Comelec ay mayroon na ngayong 171 rehistradong party-list groups, kabilang ang 118 na umiiral na organisasyon, para sa May 9 election.
