MANILA – Inaprubahan ng House Ways and Means Committee noong Huwebes ang isang substitute bill na naglalayong bawasan o suspindihin ang excise taxes sa mga produktong petrolyo.
Inaprubahan ng panel, na pinamumunuan ni Albay Representative Joey Salceda, ang panukalang magpapababa ng excise taxes sa diesel, kerosene, at liquified petroleum gas sa zero.
Iminungkahi nito na bawasan ang excise taxes sa low-octane gasoline, na pangunahing ginagamit ng mga tricycle driver, habang pananatilihin ang buwis sa premium na gasolina.
Anim na buwan ang suspensiyon ng excise tax sa mga produktong petrolyo.
“It’s immediate relief for Filipino families, especially affected sectors. The bill will cost the government around PHP45 billion, but what the government loses, the consumer gains,” wika ni Salceda.
Sinabi ni Salceda na mayroong self-correcting mechanism sa panukalang batas, at binanggit na babalik ito sa Tax Reform for Acceleration and Inclusion (TRAIN) law rates kung mag-normalize ang mga presyo.
“If it goes back to 65 dollars per barrel of crude oil, then the excise tax rates will also normalize,” aniya. “The premise of this tax relief bill is that the situation is not normal. If inflation weren’t so high, we would be discussing other matters. But now, consumers are hurting. Inflation is high. Incomes are depressed. So, immediate relief is obviously necessary.”
Inaasahan niyang ipapadala ng Kamara ang panukala sa Senado sa ikatlo o ikaapat na linggo ng Nobyembre, dahil prayoridad ito ni Speaker Velasco.
Ang panukala ay lumilikha din ng isang espesyal na pondo na tahasang ilalaan sa ayuda para sa mga apektadong sektor sa tuwing tataas ang presyo ng langis.
Ang Social Impact Stabilization Fund ay popondohan ng singil na PHP2 kada litro ng diesel at gasolina kapag ang pandaigdigang presyo ay umabot sa mas mababa sa USD45 kada bariles ng krudo.
“The government manifested in our hearings that the problem with asking for a subsidy that is larger than their PHP1 billion fund for PUVs (public utility vehicles) is the lack of sources. This one answers it for future oil price problems,” wika niya.
