MANILA – Isinapubliko ng Department of Justice (DOJ) nitong Huwebes ang kopya ng memorandum of agreement na nilagdaan ng Philippine National Police (PNP) at National Bureau of Investigation (NBI) para isagawa ang imbestigasyon sa mga insidente ng pang-aabuso ng pulisya sa anti-drug operations.

Sa ilalim ng MOA na nilagdaan ni PNP chief, Gen. Guillermo Eleazar at NBI officer in charge-director Eric Distor noong Miyerkules, ang dalawang law enforcement agencies ay nangakong suportahan ang gawaing nauugnay sa pagsusuri sa mga operasyon laban sa ilegal na droga ng gobyerno at pagsasagawa ng imbestigasyon, pagbuo ng kaso, at ang posibleng pagsasampa ng mga reklamong kriminal laban sa mga kinauukulang kapulisan.

Gayundin, ginagarantiyahan ng PNP at NBI ang integridad at ang agarang pagkakaroon sa kabilang partido ng lahat ng kinakailangang impormasyon, kabilang ang mga dokumento, record, at lahat ng nauugnay na ebidensya.

“The Parties shall collect, provide, and/or transmit documents, records, and all relevant evidence in such manner as may be deemed convenient and appropriate to ensure confidentiality,” ayon sa MOA.

Papangalanan din ng magkabilang panig ang kani-kanilang mga kinatawan na magsisimula ng mga kinakailangang gawain sa panukala sa loob ng isang buwan.

Sinabi rin sa kasunduan na ang mga partido ay magpapatibay ng pangkalahatang data privacy at mga prinsipyo sa pagbabahagi ng data sa ilalim ng Republic Act 10173 o ang Data Privacy Act of 2012.

“The Parties shall ensure the privacy and security of any and all confidential, privileged, personal, and/or sensitive information that the parties, their officers, employees, or agents may have access to, and shall store, use, dispose, and/or otherwise process the said confidential, privileged, personal and/or sensitive information, as may be applicable,” dagdag ng MOA.