MANILA – Inatasan ng Philippine National Police (PNP) nitong Lunes ang lahat ng yunit na pahusayin ang visibility at patrol activities para maiwasan ang paglobo ng mga krimen sa lansangan sa holiday season.
“I am directing all police units nationwide to sustain enhanced visibility and anti-crime patrols in areas where street criminals are known to frequently strike,” ani PNP chief, Gen. Guillermo Eleazar, sa isang pahayag.
Ito ay matapos na arestuhin ang dalawang suspek sa Maynila noong Linggo dahil sa pag-agaw umano ng bag ng isang babae na naglalakad sa kahabaan ng Magsaysay Boulevard at Lacson Avenue sa Barangay 420.
Nasaktan sa insidente ang biktima, na nagkataong Sangguniang Kabataan (Youth Council) chairperson sa Infanta, Quezon, nang hilahin siya ng mga suspek na sakay ng motorsiklo habang hinablot ang kanyang bag noong Oktubre 28.
Nahuli ng mga pulis na naka-deploy sa Manila North Cemetery ang mga suspek na sakay ng motorsiklo matapos mapansin na wala silang suot na helmet at walang plaka ang kanilang motorsiklo.
Pinaalalahanan din ni Eleazar ang publiko na mag-ingat at laging maging alerto sa kanilang paligid upang maiwasang maging biktima ng maliliit na krimen.
