MANILA – Inaasahan ng National Task Force (NTF) Against Covid-19 ang pagsisimula sa Nobyembre para sa pangangasiwa ng coronavirus disease 2019 (Covid-19) vaccine booster shots sa mga priority group.

Inaprubahan ng Department of Health (DOH) ang mga booster shot para sa mga fully vaccinated health care workers (A1) na unang nakatanggap ng mga bakuna noong Marso.

Ayon kay NTF chief implementer Secretary Carlito Galvez Jr., sa pre-recorded meeting kasama si Pangulong Rodrigo Duterte sa telebisyon noong Lunes ng gabi, uunahin din ang mga senior citizens (A2) at immunocompromised adults (A3).

Ang Health Technology Assessment Council (HTAC) at All Expert Groups on Covid-19 Vaccines, ani Galvez, ay nagpahayag ng “positibong opinyon” sa booster shot administration.

“Nagpalabas po ng kanilang positive opinion ang HTAC at ang ating All Expert Group para kapag nag-start na po tayo ng boosters sa ating mga health care workers,” wika ni Galvez.

Ayon kay Galvez, sinimulan na ng Department of Health ang pagproseso ng emergency use authorization modifications para sa iba’t ibang vaccine brands na gagamitin bilang booster shots.

Dalawang milyong booster dose ang ilalaan sa A1 priority group, at limang milyon sa A2 at A3 priority group.

“We have enough doses for them. Regardless of brand, mayroon po tayo na nakatabi,” idinagdag ni Galvez.

Sinabi ni Galvez na hinihintay na lamang nila ang All Expert Groups na mag-anunsyo kung heterologous (mixed) o homologous (same brand) ang pagbabakuna, gayundin ang pinal na gabay mula sa Strategic Advisory Group of Experts on Immunization ng World Health Organization.

Ang mga nakatanggap ng Sinovac vaccine ay maaaring bigyan ng Pfizer, AstraZeneca o Moderna bilang booster shot.