MANILA – Tumatagal umano ang Philippine Health Insurance Corp. (PhilHealth) sa pagbayad ng hospital claims dahil ang pangulo at CEO na si Dante Gierran ay nagnanais na “maging maingat” upang maiwasan ang mga karagdagang isyu.

Inihayag ito ni Pangulong Rodrigo Duterte bilang tugon sa mga alalahanin tungkol sa mabagal na pagproseso ng PhilHealth sa mga nakabinbing hospital claims, na humantong sa pagpapasara ng ilang mga ospital at pagbawas ng manpower sa ospital sa gitna ng Covid-19 pandemic.

Sinabi ni Duterte na nakipag-ugnay siya kay Gierran upang ipaliwanag kung bakit may mga pagkaantala sa pagbabayad ng mga hospital claims.

“Tinanong ko siya, pinatawag ko, ‘Bakit mahina ka?’ Sabi niya, ‘Alam mo kasi ang trabaho na ito sir, papel ito, resibo ng mga medisina, resibo ng bayaran, resibo ng admission, resibo ng pag-alis ng ospital, pag exit. Sabi niya, ‘I have to be careful’,” saad ni Duterte.

Inihayag niya ang sinabi ni Gierran na ang PhilHealth ay “hindi makakagalaw nang mas mabilis” dahil ayaw niyang maakusahan ng iregularidad.

Ayon kay Duterte, ang pagtatrabaho sa ilalim ng skeletal force dahil sa pandemya ay lalong nagpapahirap sa paghawak ng mga hindi nabayarang hospital claims, na binanggit ang tagapagsalita ng PhilHealth na si Dr. Shirley Domingo.

Hinimok niya ang mga indibidwal na pumupuna sa PhilHealth at Department of Health (DOH) na maging mapagpasensya.

“Kindly consider the reduced manpower of the departments. Huwag ninyong apurahin kasi hindi ninyo maapura ‘yan. Mabuti sana kung tumutulong kayo diyan,” aniya.

Nauna nang nagbanta ang mga ospital na umalis mula sa PhilHealth sa pamamagitan ng hindi pag-renew ng kanilang akreditasyon sa susunod na taon kung ang ahensya ay magpapatupad ng controversial circular na nagbabawal sa pagbabayad ng mga hospital claim.

Noong nakaraang linggo, sinabi ni Gierran na ang PhilHealth ay may utang sa mga ospital na kabuuang PHP21.1 bilyong halaga ng hindi nabayarang hospital claims.

Naging emosyonal din siya bilang tugon sa pamimintas na nakadirekta sa kanya at sa kanyang ahensya, na sinasabing may epekto ito sa kanyang mga kaibigan at pamilya.

Samantala, inilahad muli ni Duterte ang pag-release ng Department of Budget and Management (DBM) na PHP311.79 milyon para sa special risk allowance (SRA) ng mga pampubliko at pribadong health worker sa bansa.

Inatasan ni Duterte ang DBM at DOH na bayaran ang naantalang allowance ng mga front-liner sa loob ng 10 araw.