MANILA – Idineklara ng Malacañang noong Huwebes na ang pag-uuri ng quarantine sa National Capital Region (NCR) at mga lalawigan ng Laguna at Bataan ay ibinaba mula sa enhanced community quarantine (ECQ) sa modified ECQ (MECQ).

Ito ay matapos na pahintulutan ni Pangulong Rodrigo Duterte ang pinakabagong status ng quarantine sa Metro Manila, Laguna, at Bataan batay sa panukala ng Inter-Agency Task Force for the Management of Emerging Infectious Diseases (IATF-EID), ayon kay Presidential Spokesperson Harry Roque.

“These latest classifications are without prejudice to the strict implementation of granular lockdowns,” sinabi ni Roque, na kumikilos din bilang tagapagsalita ng IATF-EID, sa isang pahayag.

Isinaad ni Roque na ang Metro Manila ay ilalagay sa ilalim ng MECQ mula Agosto 21 hanggang 31.

Sa kabilang banda, ang Bataan ay sasailalim ng MECQ mula Agosto 23 hanggang 31, aniya.

Dahil sa pagtaas ng impeksyon sa coronavirus disease 2019 (Covid-19), ang Metro Manila, Laguna, at Bataan ay una nang inilagay sa ilalim ng ECQ, ang pinakamahigpit na uri ng quarantine ng komunidad.

Sa kabila ng pagbaba ng antas ng kuwarentenas, nagbabala si Roque na ang mga relihiyosong pagtitipon sa Metro Manila, Laguna, at Bataan ay dapat manatiling “virtual”.

Dagdag din niya na ang mga indoor at outdoor na dine-in service, pati na rin ang personal care service tulad ng beauty salon, beauty parlor, barbershop, at nail spa, ay ipinagbabawal pa rin.

Ang mga lokal na pamahalaan sa Metro Manila, Laguna, at Bataan, ayon kay Roque, ay inaatasan din upang palakasin ang pagbabakuna sa kani-kanilang mga lugar, pati na rin ang pagpapaigting sa “Prevent-Detect-Isolate-Treat-Reintegrate” (PDITR) na istratehiya upang kontrolin ang pagkalat ng Covid-19.

Gayunpaman, sinabi niya na ang basic public health protocol ay dapat na sundin sa lahat ng tatlong mga rehiyon.

“These protocols shall be observed in the aforesaid areas under the inclusive dates they are under MECQ,” saad ni Roque.