MANILA – Inatasan ng Philippine National Police (PNP) ang Special Action Force (SAF) nitong Martes na siyasatin ang status ng mga hindi nakakamit na procurement contract na iniulat ng mga state auditor.

“I have directed the leadership of the SAF to determine and immediately report to me why some of these procurement contracts have not materialized. I have also tasked the SAF to report the current status of the contracts,” sinabi ni PNP chief, Gen. Guillermo Eleazar sa isang pahayag.

Ipinahayag ng Commission on Audit (COA) sa kanilang 2020 audit report na hindi bababa sa 29 na mga procurement contract ang isinagawa ng SAF kasama ang iba’t ibang mga supplier ang hindi pa naihatid hanggang sa katapusan ng nakaraang taon.

Inirekomenda din ng COA sa PNP na kanselahin ang mga kontrata para sa mga troop carrier, armored vehicle, machine gun, rifle, granada at rocket launcher, pistola, mortar, parachute, at tactical vest, at iba pa.

“We will consult with our PNP Legal Service kung ano ang mga susunod na hakbang na aming dapat gawin hinggil dito,” dagdag ni Eleazar.

Ayon kay Eleazar, ang mga kontratang ito para sa pagkuha ng iba’t ibang kagamitan para sa SAF ay makabuluhan sa pagpapabuti ng kakayahan sa pagpapatakbo ng unit.

“Kaya’t ang focus natin dito ay talagang ma-i-deliver sa ating SAF ang mga equipment na makatutulong ng malaki sa kanilang operasyon,” dagdag niya.