MANILA – Sinabi ni Pangulong Rodrigo Duterte noong Miyerkules na ang mga siyentistang Pilipino ay kinakailangang mag doble kayod upang makabuo ng kanilang sariling mga bakuna sa Covid-19, upang hindi umasa ang bansa sa mga supply mula sa ibang bansa.
Hinimok ni Duterte ang mga siyentistang Pilipino na gawin ang lahat na makakaya upang makabuo ng kanilang sariling mga bakuna lalo na’t nagsisimula nang lumitaw ang mga bagong Covid-19 variant sa iba’t ibang mga bansa.
“Our scientists must work double the time…Mag-isip talaga kayo. If you have to pour your, ano, matutunaw yung utak ninyo,” sinabi niya sa paunang naitalang pagpupulong kasama ang mga opisyal ng Partido Demokratiko Pilipino-Lakas ng Bayan (PDP-Laban) at iba pang mga opisyal ng gobyerno sa Malago Clubhouse sa Malacañang, Maynila noong Lunes ng gabi.
Sinabi niya na naniniwala siyang may kakayahang gumawa ang mga siyentistang Pilipino ng kanilang sariling bakuna sa Covid-19, na nabanggit na ang gobyerno ay nagbigay ng sapat na pondo para sa kadahilanang ito.
“We cannot be dependent, ill-afford to just sabihin doon sa ibang tao na ‘Bigyan mo kami, bigyan mo dito.’ That cannot go on. We must develop,” dagdag niya.
Samantala, sinabi ni Duterte na magpapatuloy siyang manalangin para sa tagumpay ng patuloy na pagsisikap para sa lokal na paggawa ng mga bakunang Covid-19.
“I am also praying at the same time that they can come up with good results of their studies and make some vaccines that are really, truly Filipino,” saad niya.
Nauna nang inilarawan ni Duterte ang posibilidad na magkaroon ng mga bakunang Covid-19 na ginawa sa bansa bilang isang “sagot sa panalangin”.
Sa kasalukuyan, nakikipag-usap ang Department of Science and Technology (DOST) sa mga potensyal na tagagawa ng bakuna sa pagpaplano para sa lokal na paggawa ng mga bakunang Covid-19.
Inatasan ni Duterte ang mga naaangkop na ahensya ng gobyerno na bilisan ang pagproseso ng mga kinakailangan upang suportahan ang lokal na paggawa ng mga bakuna.
Kasalukuyang walang lokal na tagagawa ng bakuna sa Pilipinas at ang gobyerno ay kailangang bumili ng mga bakunang Covid-19 mula sa ibang mga bansa.
Ang mga tatak ng bakuna na kasalukuyang bahagi ng imbentaryo ng Pilipinas ay ang Sinovac, AstraZeneca, Pfizer, Sputnik V, at Moderna.
