May karapatan sa privacy ang mga nag-organisa ng community pantry at hindi kinakailangan ng permit para makatulong sa mga nangangailangan, pahayag ng Integrated Bar of the Philippines (IBP) noong Huwebes.

Pansamantalang ipinahinto ng Maginhawa community pantry ang operasyon nito noong Martes matapos hingin ng tatlong pulis ang impormasyon at contact number ng organizer nitong si Ana Patricia Non.

Ayon kay IBP President Domingo Cayosa, puwedeng tumanggi ang organizers ng community pantries sa pagbibigay ng personal na impormasyon sa ibang tao.

Aniya, “These community pantries should be praised rather than profiled, they should be replicated rather than red-tagged, and they should be supported rather than stopped…Feeding the poor regardless of who is doing it is never illegal.”

“Kailangan ng legal na basehan kung bakit hinihingi ang mga detalyeng ‘yun. Natatakot ang taumbayan tuloy pati rin yung gustong makinabang,” giit nito.

Idinagdag nitong hindi kailangan ng permit upang makatulong sa mahihirap.

“It’s a public service so they can use public space for that public service,” ani Cayosa.

“Maganda sana magkaroon din ng programa ang ibang ahensiya ng gobyerno, sabayan itong private initiative…Let’s just get our acts together rather than obstruct the good that is being done. Let’s just cooperate and do more of it,” dagdag pa nito.