Inihayag ng OCTA Research Group noong Biyernes na bumagal ang pag-akyat ng Covid-19 cases sa Metro Manila kasunod ng pagpapatupad ng striktong lockdown.

Base sa huli nitong report, nabawasan ang reproduction rate, ang bilang ng mga taong nahahawa ng isang Covid-19 patient, sa 1.58 pagkatapos ipatupad ang enhanced community quarantine (ECQ) sa Metro Manila at apat na karatig lalawigan noong Marso 29.

4,899 new cases ang naitala sa Metro Manila mula Marso 25 hanggang Abril 1.

“The good news is that the growth rate compared to the previous week has now slowed down to just 19%… This percentage increase is much lower compared to previous weekly increases of 60%,” pahayag ng OCTA.

Nagpakita aniya ng pagbaba sa reproduction rate ang Quezon City, Manila, Caloocan, Makati, Parañaque, at Valenzuela.

Gayunpaman, sinabi ng independent research group na “attributed in part” ito sa bawas na testing sa loob ng National Capital Region. 25,880 Covid-19 tests lamang ang isinagawa sa Metro Manila mula Marso 28 hanggang 31 – isang 12% decrease kumpara sa average na bilang ng tests na isinagawa noong Marso 21 hanggang 27.

“The problem is that with a high positivity rate of 23%, there is a need to further scale up PCR testing to be able keep up with the surge in new COVID-19 cases,” dagdag pa ng grupo.

Patuloy din umanong tumataas ang daily attack rate sa 35.5 per 100,000 na populasyon, kung saan nangangahulugan itong sentro pa rin ang NCR ng Covid-19 sa bansa.

Ang isang-linggong ECQ sa Metro Manila, Rizal, Bulacan, Cavite, at Laguna ay nakatakdang magtapos sa Abril 4, subalit inirekomenda ng mga eksperto at ng Department of Health (DOH) ang isa pang linggo ng lockdown upang makita ang pagbaba sa Covid-19 cases at hospital admissions.

Naitala noong Biyernes ang 15, 310 na panibagong Covid-19 cases sa bansa, ang pinakamataas na bilang simula nang manalasa ang Covid-19 pandemic.