Itinalaga ni Pangulong Rodrigo Duterte ang abogadong si Aimee Ferolino-Ampoloquio, provincial election supervisor ng Davao del Norte, bilang bagong commissioner ng Commission on Elections.

Pareho itong kinumpirma ng Comelec at Malacañang noong Huwebes.

Natanggap ni Ferolino-Ampoloquio ang nominasyon noong Nobyembre 24, at magsisilbi ito hanggang Pebrero 2, 2027. Sa kanyang pagkakatalaga, kukumpletuhin ng opisyal ang seven-member en banc ng Comelec, kung saan papalitan nito si dating Commissioner Al Parreño na nagretiro noong Pebrero.

“Commissioner Ferolino-Ampoloqiuo’s vast experience in the frontline of election service will greatly contribute to the Commission’s thrust to ensure that our electoral processes are responsive to the varying needs of our electorate— making sure that our elections are more inclusive,” pahayag ng Comelec.

Bago ang kanyang kasalukuyang posisyon sa Davao del Norte, nagsilbi si Ferolino-Ampoloquio bilang election supervisor para sa Compostela Valley. Nagtrabaho rin ito bilang election assistant at emergency laborer para sa Comelec.