Inaprubahan ni Pangulong Rodrigo Duterte noong Setyembre 14 ang rekomendasyon ng isang inter-agency task force, na nag-imbestiga sa mga aktibidad ng katiwalian sa loob ng Philippine Health Insurance Corp. (PhilHealth), na magsampa ng mga kasong kriminal at administratibo laban kay resigned PhilHealth President at Chief Executive Officer Ricardo Morales at iba pang opisyal ng ahensya.
Binasa ng pangulo ang naging rekomendasyon ng Task Force PhilHealth sa kanyang televised broadcast sa publiko kung saan nakikipagpulong din ito sa mga miyembro ng Inter-Agency Task Force for the Management of Emerging Infectious Diseases (IATF-EID) sa Malago Clubhouse sa Malacañang noong Setyembre 14.
“I have to read this because first, the issue of PhilHealth corruption was really an important issue to the Filipinos and everybody. I’m sorry for them, but they will have to undergo trial, although they can always prove their guilt beyond reasonable doubt. The presumption of innocence is still attached (Kailangan ko itong baasahin dahil importanteng isyu ang PhilHealth sa taumbayan. Sorry sa kanila, subalit kinakailangan nilang sumailalim sa paglilitis),” ani Duterte.
Sa isinumiteng 177-pahinang report at recommendations sa pangulo, sinabi ng Task Force PhilHealth na ang kabuuan ng ebidensiyang iprenesenta ay sumusuporta sa konklusyon na gumawa ng kamalian ang ilang mga opisyal ng PhilHealth.
Ang iba pang mga opisyal na inirekomendang sampahan ng kaso ay sina Senior Vice President (SVP) at Chief Information Officer Jovita V. Aragona, senior Information and Communication Technology officer Calixto Gabuya Jr., Executive Vice President at Chief Operating Officer Arnel De Jesus, SVP Ernesto Limiasco Jr., SVP Israel Pargas, at Division Chief Bobby Crisostomo.
Ayon sa task force, ang mga opisyal ng PhilHealth Executive Committee ay lumabag sa Republic Act (RA) 1319 o the Anti-Graft and Corrupt Practices Law pati na rin ang Revised Penal Code.
Inirekomenda rin ng task force na maging liable ang mga nasabing opisyal sa paglabag sa national internal revenue code kaugnay sa kanilang “hindi pag-withhold ng buwis sa IRM (Interim Reimbursement Mechanism) releases”.
Kabilang din sa rekomendasyon ng task force kay Duterte ang “mariing pagpapaalala” kay Health Secretary Francisco Duque III, bilang PhilHealth chairman, at iba pang miyembro ng PhilHealth board tungkol sa mga maaaring maging kaparusahan ng kanilang mga gawain sa loob ng PhilHealth.
