Inanunsyo ng mga aktres na sina Angel Locsin at Anne Curtis ang pagbabalik ng kanilang “Shop and Share” project na naglalayong kumalap ng pondo para sa pagbili ng Covid-19 test kits. Nanawagan ang dalawa sa kani-kanilang mga kaibigan at kapwa artista na suportahan ang inisyatiba upang makatulong sa laban kontra Covid-19.
“With the funds we raise, we would like to purchase test kits and allow testing opportunities for the poorer sectors, in the hopes of helping out in the efforts to provide mass testing in the country, (Sa pondong ating malilikom, bibili tayo ng test kits upang makatulong sa hakbang ng mass testing lalo na sa mga mahihirap),” sinabi ni Locsin sa isang social media post. Dagdag pa niya, ito ang nakikita niyang paraan upang maipatupad ng maayos ang “TEST-TRACE-ISOLATE/TREAT” formula na ayon sa kanya ay pinaka-epektibong solusyon kontra Covid-19.
Naunang inilunsad ang nasabing proyekto noong 2009 sa kasagsagan ng Bagyong Ondoy upang makapagbigay-tulong sa mga nasalanta. Namahagi ng iba’t-ibat personal items ang mga artista, singer, at atleta upang maibenta at makalikom ng pondong kinalaunan ay ibinigay sa Philippine Red Cross bilang donasyon.
Nagpahayag na ng suporta ang ibang mga celebrities na sina Dimples Romana, Sarah Lahbati, and Maxene Magalona.
Nataon ang anunsyo sa parehong araw na sinabi ni Presidential Spokesperson Harry Roque na walang plano ang pamahalaan na magsagawa ng mass testing at ipinauubaya na ito sa kamay ng pribadong sektor. Depensa niya, “physically impossible” ang pagtest sa buong populasyon. Sa halip ay 1.5% hanggang 2% ng kabuuang popolasyon ng bansa ang balak itest ng pamahalaan.
